Ասֆալտապատվում է Վարդենիս քաղաքի Վիկտոր Համբարձումյան փողոցը

Գեղարքունիքի մարզի Վարդենիս քաղաքի Վիկտոր Համբարձումյան փողոցում ՀՀ կառավարության կողմից իրականացվող սուբվենցիոն ծրագրերի շրջանակներում ընթանում են ճանապարհի երթևեկելի մասի ասֆալտապատման ու միակողմանի մայթի կառուցման աշխատանքներ։

Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից, Վիկտոր Համբարձումյան փողոցի հիմնանորոգման ծրագրի պայմանագրային արժեքը կազմում է 303 միլիոն 102 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Վարդենիսի համայնքապետարանը։ Ծրագրով նախատեսված է Վիկտոր Համբարձումյան փողոցի երթևեկելի մասի ասֆալտապատում՝ 1867 գծամետր երկարությամբ և 19 հազար 635 քմ մակերեսով, միակողմանի մայթի կառուցում և ասֆալտապատում՝ 2507 քմ մակերեսով, ջրահեռացման համակարգի տեղադրում, ճանապարհի կահավորում և գծանշում։

Շինարարական աշխատանքների մեկնարկը տրվել է 2023 թվականի աշնանը և ընդհատվել՝ «Վեոլիա ջուր» կազմակերպության կողմից ջրաշինական աշխատանքների իրականացման պատճառով։ Շինարարությունը, որն իրականացնում է «Կապավոր» ՍՊԸ-ն, նախատեսվում է ավարտել 2025 թվականի ընթացքում։