Չիլիում ալիքների բարձրությունը Կամչատկայի երկրաշարժից հետո հասել է 2,5 մետրի

Ալիքների բարձրությունը, որոնք Չիլիի ափին առաջացել են  Կամչատկայում տեղի ունեցած երկրաշարժից հետո, հասել է 2.5 մ-ի: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտնել է Չիլիի Տարերային աղետների դեմ պայքարի ազգային ծառայությունը:

Ամենաբարձր ալիքները՝ 2,5 մ, գրանցվել են Չիլիի կենտրոնական մասի Բոյերուկա բնակավայրում: Երկրի մեծությամբ երկրորդ  քաղաք Վալպարաիսոյում գրանցվել են 0,6 մ բարձրությամբ ալիքներ: Չիլիի հյուսիսում գտնվող Արիկա քաղաքում ալիքների բարձրությունը կազմել է 1,1 մետր:

«Ցանկանում ենք հայտնել, որ [ցունամիի սպառնալիքի պատճառով] տագնապը պահպանվում է», - մամուլի ասուլիսում հայտարարել է ներքին գործերի նախարար Ալվարո Էլիսալդեն: Ափամերձ շրջանների բնակիչներին խորհուրդ է տրվում մնալ անվտանգ վայրերում:

Ռուսաստանի ափերի մոտ՝ Կամչատկայի ափերին հուլիսի 30-ին գրանցված 8,8 մագնիտուդով երկրաշարժը ինչպես ՌԴ-ի, այնպես էլ Ճապոնիայի, ԱՄՆ-ի, Չինաստանի, Ֆիլիպինների և մի շարք այլ երկրների ափերին ցունամիներ էր առաջացրել։ 

Անվտանգության նկատառումներից ելնելով՝ մեծ թվով մարդիկ տարհանվել են ափամերձ գոտիներից։