368.59
Իրանը հայտնել է, թե որ դեպքում կմնա Միջուկային զենքի չտարածման մասին պայմանագրի անդամ
1 րոպեի ընթերցում
Իրանը Միջուկային զենքի չտարածման մասին պայմանագրի անդամ կմնա՝ պայմանով, որ օգտվի դրանով նախատեսված բոլոր իրավունքներից, այդ թվում՝ ուրանը հարստացնելու իրավունքից: «Արմենպրես»-ի փոխանցմամբ՝ այս մասին հայտարարել է Իրանի արտաքին գործերի նախարարության խոսնակ Էսմայիլ Բաղային:
Նա նաև նշել է, որ Թեհրանը մտադիր է շարունակել միջուկային ծրագրի շուրջ «եվրաեռյակի» երկրների (Մեծ Բրիտանիա, Ֆրանսիա և Գերմանիա) հետ Ստամբուլում հուլիսի 25-ին սկսված բանակցությունները:
«Եվրոպական երկրների հետ Իրանի բանակցությունները հստակ և որոշակի թեմայի շուրջ են՝ պատժամիջոցների վերացման և միջուկային ծրագրի», - ասել է Իրանի ԱԳՆ խոսնակը:
Բաղային շեշտել է, որ եվրոպական երկրներն իրավական հիմքեր չունեն՝ ակտիվացնելու Թեհրանի դեմ պատժամիջոցների վերականգման մեխանիզմը, և որ Իրանն իր դիրքորոշման մասին հայտնել է այդ երկրներին:
Իրանի ԱԳՆ խոսնակը հավելել է, որ Միացյալ Նահանգների հետ բանակցություններ անցկացնելու ծրագրեր առայժմ չկան:
Բաղային նաև հայտնել է, որ Ատոմային էներգիայի միջազգային գործակալության պատվիրակությունը կարող է առաջիկա երկու շաբաթվա ընթացքում այցելել Իրան՝ քննարկելու համագործակցության շարունակման տարբերակները:
Բաժանորդագրվեք մեր ալիքին Telegram-ում