2 րոպեի ընթերցում
Գյումրիում Վարդավառի տոնը նշվեց ջերմ ու ուրախ մթնոլորտում՝ պահպանելով ինչպես տոնի ավանդական ջրախաղերը, այնպես էլ հոգևոր և ազգային խորհուրդը։ Ինչպես հաղորդում է «Արմենպրես»-ը, հիմնական միջոցառումներն անցկացվեցին Վարդանանց հրապարակում։ Վարդավառին նվիրված միջոցառումները սկսվեցին հուշարձանների լվացման արարողությամբ՝ որպես մաքրության և նորոգման խորհրդանիշ։ Հրապարակում գործում էին շատրվաններ, և տոնը ուղեկցվում էր ուրախ ջրախաղերով։
Նախօրեին Գյումրու համայնքապետարանը տարածել էր հայտարարություն, որտեղ նշվում էր, որ Գյումրու քաղաքապետարանը՝ հարգելով Գյումրու ավագանու «Իմ հզոր համայնք» խմբակցության ղեկավար Ռուբեն Մխիթարյանի առաջարկությունը, որը պայմանավորված է Շիրակի թեմի առաջնորդ Միքայել սրբազանի կալանավորման հանգամանքով, այս տարի Վարդավառը կդիտվի համեստ ձևաչափով։ Միևնույն ժամանակ, հաղորդվում էր, որ Վարդավառին նվիրված միջոցառումները կկայանան Վարդանանց հրապարակում։
Ավագանու «Քաղաքացիական պայմանագիր» խմբակցության քարտուղար Քնարիկ Հարությունյանը «Իմ հզոր համայնք» խմբակցության ղեկավար Ռուբեն Մխիթարյանի առաջարկությանն ի պատասխան նշել էր, որ երեք հոգանոց խմբակցությունը չի կարող Գյումրու և գյումրեցիների անունից խոսել ու սահմանել տոնի քաղաքական օրակարգ՝ կոչ անելով չխլել տոնը մարդկանցից։
Հիսուս Քրիստոսի Պայծառակերպության տոնին ընդառաջ՝ Շիրակի թեմի նախաձեռնությամբ, Գյումրիում տեղի ունեցավ ուխտերթ։ Այն սկսվեց քաղաքի Անի թաղամասում գտնվող Սուրբ Հակոբ Մծբնեցի եկեղեցուց և ավարտվեց Սուրբ Ամենափրկիչ եկեղեցու բակում։ Թափորը կանգ առավ նաև Սուրբ Գրիգոր Լուսավորիչ և Սուրբ Աստվածածին (Յոթ Վերք) եկեղեցիների մոտ, որտեղ կատարվեցին անդաստաններ և քարոզներ՝ ըստ ավանդույթի։
Ինչպես հաղորդում են Շիրակի թեմից, խաչերթը տեղի ունեցավ Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանի օրհնությամբ։