2 րոպեի ընթերցում
Իսրայելի արտաքին գործերի նախարար Գիդեոն Սաարի հանձնարարությամբ երկիրը լրացուցիչ օգնություն կտրամադրի Ուկրաինային: «Արմենպրես»-ի փոխանցմամբ՝ այս մասին X-ի միկրոբլոգում գրառում է հրապարակել Իսրայելի արտաքին գործերի նախարարությունը։
Հայտարարության համաձայն՝ ջրային համակարգեր կմատակարարվեն հարյուր հազարավոր մարդկանց Ուկրաինայի այն տարածքներում, որտեղ ջրային ենթակառուցվածքները վնասվել են ռուսական ռմբակոծություններից։
«Արտաքին գործերի նախարար Գիդեոն Սաարը հուլիսի 3-ին Իսրայելում Ուկրաինայի դեսպան Եվգենի Կորնիյչուկին տեղեկացրել է, որ հանձնարարել է իր նախարարությանը Ուկրաինային ՄԱՇԱՎ-ի (Արտաքին գործերի նախարարությանը պատկանող Իսրայելի ազգային օգնության գործակալություն) միջոցով տրամադրել օգնության փաթեթ, որը կապահովի խմելու ջրի համակարգեր՝ ռուսական ռմբակոծություններից տուժած տարածքներում հարյուր հազարավոր մարդկանց սպասարկելու համար»,- նշվում է հաղորդագրության մեջ:
Նաև հաղորդվում է, որ օգնության փաթեթը կֆինանսավորվի Իսրայելի արտաքին գործերի նախարարության բյուջեից:
«Այս օգնության փաթեթը միանում է մարդասիրական օգնությանը, որ Իսրայելը տրամադրել է Ուկրաինային 2022 թ. փետրվարին պատերազմի սկսվելուց ի վեր։ Որպես այս օգնության մաս՝ Իսրայելը գործարկել է «օդային և ցամաքային կամուրջներ» դեպի Ուկրաինա՝ մատակարարելով սնունդ, դեղորայք և այլ անհրաժեշտ պարագաներ։ Պատերազմի սկզբում հիմնվել է դաշտային հիվանդանոց, իսկ 2025 թվականի առաջին եռամսյակում ռմբակոծություններից տուժած շրջաններում բաշխվել են էլեկտրաէներգիայի հարյուրավոր մատակարարման բլոկներ», - ասվում է հաղորդագրության մեջ։