Ճապոնիայի վարչապետը դատապարտել է Իսրայելի հարվածները Իրանի վրա՝ կոչ անելով կանխել իրավիճակի էսկալացիան
1 րոպեի ընթերցում
Ճապոնիայի վարչապետ Շիգերու Իշիբան խիստ քննադատության է ենթարկել Իսրայելի կողմից Իրանի միջուկային և ռազմական օբյեկտների վրա իրականացված հարձակումները։ Ինչպես տեղեկացնում է «Արմենպրես»-ը, վկայակոչելով kyodonews-ը, լրագրողների հետ զրույցում Իշիբան շեշտել է, որ անհրաժեշտ է ձեռնպահ մնալ ցանկացած գործողությունից, որը կարող է հանգեցնել իրավիճակի հետագա էսկալացիայի, ակնարկելով Իրանի պատասխան գործողությունները։
Նա նաև ընդգծել է, որ Ճապոնիան պատրաստ է համագործակցել «Մեծ յոթնյակի» (G7) մնացած անդամների հետ՝ Մերձավոր Արևելքում լարվածությունը նվազեցնելու նպատակով։
Ճապոնիայի վարչապետը հայտարարել է, որ երկուշաբթի Կանադայում մեկնարկող G7 երկօրյա գագաթնաժողովի ընթացքում կբարձրաձայնի Տոկիոյի պաշտոնական դիրքորոշումը։