2 րոպեի ընթերցում
Իսրայելական հատուկ գործողությունների շնորհիվ հաջողվել է դրդել Իրանի ռազմաօդային ուժերի բարձրագույն հրամանատարներին հավաքվել նույն վայրում՝ Իսրայելի հարվածներից անմիջապես առաջ։ «Արմենպրես»-ի հաղորդմամբ՝ այս մասին Fox News-ին հայտնել է Իսրայելի անվտանգության ոլորտի բարձրաստիճան պաշտոնյան։
«Մենք իրականացրել ենք հատուկ գործողություններ, որոնք օգնել են մեզ ավելին իմանալ նրանց մասին, ապա այդ տեղեկատվությունը կիրառել ենք՝ նրանց վարքը ձևավորելու նպատակով։ Մենք գիտեինք, որ դա կհանգեցնի նրանց հավաքվելուն, բայց առավել կարևորն այն էր, որ մենք գիտեինք՝ ինչպես ապահովել, որ նրանք մնան այդ վայրում»,– նշել է իսրայելցի պաշտոնյան։
Ըստ աղբյուրի, հարվածներն ավելի արդյունավետ են եղել, քան նախապես սպասվում էր։ Մասնավորապես, իրականացվել են կանխարգելիչ հարվածներ Իրանի ՀՕՊ համակարգերին և բալիստիկ հրթիռներին, որոնք Թեհրանը նախատեսում էր օգտագործել Իսրայելի դեմ։
Հունիսի 13-ի առավոտյան Իսրայելի պաշտպանության բանակը ավիահարվածներ է հասցրել Իրանի միջուկային օբյեկտներին, բնակելի շենքերին։ Հարվածների հետևանքով զոհվել են իրանցի բարձրաստիճան զինվորականներ, միջուկային ոլորտի գիտնականներ։
Ավելի վաղ հաղորդվել էր խաղաղ բնակիչների թվում 5 զոհի և 95 վիրավորի մասին։