2 րոպեի ընթերցում
Իրանի և ԱՄՆ-ի ներկայացուցիչների միջև Թեհրանի միջուկային ծրագրի շուրջ տարաձայնությունների կարգավորման շուրջ բանակցությունների վեցերորդ փուլը կկայանա հունիսի 15-ին Օմանի մայրաքաղաք Մասկատում: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է իսլամական հանրապետության արտաքին գործերի նախարարության պաշտոնական ներկայացուցիչ Էսմայիլ Բաղային:
«Իրանաամերիկյան անուղղակի բանակցությունների հաջորդ փուլը նախատեսվում է անցկացնել կիրակի օրը Մասկատում», - ասել է նա:
Մայիսի 23-ին Իրանը և ԱՄՆ-ն Հռոմում անցկացրել են միջուկային ծրագրի շուրջ բանակցությունների հինգերորդ փուլը: Օմանի արտաքին գործերի նախարար Բադր ալ Բուսայիդին, որը միջնորդ է հանդես գալիս կողմերի միջև, հայտնել է «որոշակի, բայց ոչ վերջնական առաջընթացի» հասնելու մասին: Խորհրդակցությունների առաջին փուլը տեղի է ունեցել ապրիլի 12-ին Մասկատում, երկրորդն՝ ապրիլի 19-ին Հռոմում, երրորդը և չորրորդն՝ ապրիլի 26-ին և մայիսի 11-ին՝ կրկին Օմանի մայրաքաղաքում:
Հունիսի 1-ին Սպիտակ տանը հայտարարել են, որ ԱՄՆ նախագահի հատուկ բանագնաց Սթիվեն Ուիթքոֆն Իրանի կառավարությանն է ուղարկել «մանրամասն և ընդունելի» առաջարկ Թեհրանի միջուկային ծրագրի վերաբերյալ: Axios լրատվական հարթակի տվյալներով՝ այն նախատեսում է համաձայնություն ուրանի՝ ցածր մեծություններով հետագա հարստացման պահպանում մի ժամանակահատվածում, որի տևողությունը կորոշվի ավելի ուշ:
Իրանի արտաքին գործերի նախարարությունը նշել է, որ երկրի նկատմամբ պատժամիջոցների լիովին վերացման դեպքում կառավարությունը պատրաստ է ԱՄՆ-ի հետ քննարկելու ուրանի հարստացման ծավալների և մակարդակի սահմանափակումը։ Գերատեսչությունը շեշտել է, որ Թեհրանը երբեք չի դիմի իր միջուկային ծրագրի վերացման, քանի որ խաղաղ ատոմի իրավունքը երաշխավորված է բոլոր այն պետությունների համար, որոնք ստորագրել են Միջուկային զենքի չտարածման պայմանագիրը, որին Թեհրանը միացել է առաջիններից մեկը: