Փաշինյանը վստահ է, որ Հայաստանում բարձր աշխատավարձ հիմնականում ստանում են մրցունակ կրթություն ունեցողները

Հայաստանի վարչապետ Նիկոլ Փաշինյանը վստահ է, որ բարձր աշխատավարձ ստացող քաղաքացիների գերակշիռ մասն ունի մրցունակ կրթություն։ 

«Արմենպրես»-ի հաղորդմամբ՝ այդ մասին նա հայտարարեց Ազգային ժողովի մշտական հանձնաժողովների համատեղ նիստում՝ «ՀՀ 2024 թվականի պետական բյուջեի կատարման մասին» տարեկան հաշվետվության նախնական քննարկման ժամանակ։

«Բարձր աշխատավարձ հիմնականում՝ մոտավորապես 80-90 տոկոսով, ստանում են նրանք, որոնք մրցունակ կրթություն են ստացել։ Ցածր աշխատավարձ ստանում են հիմնականում նրանք, որոնք չեն ստացել մրցունակ կրթություն։ Ինչո՞ւ եմ ասում 80-90 տոկոս և ոչ 100 տոկոս, որովհետև մեծ է հավանականությունը կամ կա հավանականություն, որ 10-20 տոկոսը կարող են բարձր աշխատավարձ ստանալ ոչ թե կրթության, այլ ուրիշ գործոնների պատճառով՝ ներառյալ անարդարությունը, կարգավորումները և այլն և այդպես շարունակ, բայց ես որևէ կերպ հնարավոր չեմ համարում, որ այդ շեղումը հնարավոր լինի 10-20 տոկոսից»,- ասաց վարչապետը։ 

Փաշինյանի խոսքով՝ սա կարող է ընկալվել որպես աղմկոտ հայտարարություն, սակայն իր դիտարկումները փաստում են՝ աշխատաշուկայում կրթության մրցունակության և վարձատրության միջև գոյություն ունի ուղղակի կապ։ 

«Այս 80-90 տոկոսի մասին հիշատակումն է պատճառը, որ կրթության ոլորտի բարեփոխումներն այսքան կարևոր են մեզ համար։ Կառավարությունում տեղի ունեցած քննարկումների արդյունքում մենք որոշել ենք, որ հանրակրթական դպրոցներում մեր աշակերտներին հենց այս ուղերձը պետք է տանք։ Պետք է նրանց ուղիղ և աներկբա ասենք՝ «սիրելի երեխաներ, լավ սովորեք, որ լավ ապրեք»»,- եզրափակեց Փաշինյանը։