2 րոպեի ընթերցում
Բարձրագույն դատական խորհրդի նախագահ Արթուր Աթաբեկյանը բարձրաստիճան պատվիրակության կազմում եռօրյա աշխատանքային-ճանաչողական այցով Սինգապուրում է։
Ինչպես «Արմենպրես»-ը տեղեկանում է ՀՀ ԲԴԽ-ի տարածած հաղորդագրությունից, Ասիական զարգացման բանկի կողմից նախաձեռնած այցի նպատակը լուծման այլընտրանքային մեխանիզմներին ու արդյունավետ դատական համակարգի լավագույն փորձին ծանոթանալն է։
Մայիսի 27–ին, ի թիվս մի շարք հանդիպումների, հայաստանյան պատվիրակությունը հանդիպել է նաև Օրենքի նախարար, Ներքին գործերի երկրորդ նախարար Էդվին Տոնգին։ Հանդիպմանը քննարկվել են ժամանակակից և արդյունավետ իրավական համակարգին առնչվող բարեփոխումները, անդրադարձել են արդարադատության հարցերով միջազգային և տարածաշրջանային կազմակերպությունների ու երկկողմ գործընկերների հետ համագործակցության եղանակներին։
Գործընկերներն անդրադարձել են արդարադատության մատչելիությանը նպաստող սինգապուրյան գործիքակազմին։
Հայ պատվիրակներին է ներկայացվել արբիտրաժային և մեդիացիոն համակարգերի, թվային դատարանների և արդիական տեխնոլոգիաների կիրառման ոլորտներում առկա ձեռքբերումները։
Վեճերի լուծման առաջատար կենտրոն Սինգապուրում հայաստանյան բարձրաստիճան պատվիրակությունն այցելելու է ազգային դատարաններ, Սինգապուրի միջազգային առևտրային դատարան, Սինգապուրի միջազգային արբիտրաժային կենտրոն, Սինգապուրի միջազգային հաշտարարության կենտրոն և արդարադատության իրականացմանն առնչվող մի շարք այլ կենտրոններ՝ հանդիպելու ղեկավար կազմին։ Այցի ընթացքում քննարկվելու են վեճերի լուծման այլընտրանքային եղանակների հաջողված մոդելները և դրանց կիրառման ու տեղայնացման հնարավորությունները Հայաստանում։
Հայաստանյան պատվիրակության կազմում են ՀՀ արդարադատության նախարար Սրբուհի Գալյանը, ԱՆ տեղակալ Տիգրան Դադունցը, ՀՀ վճռաբեկ դատարանի քաղաքացիական պալատի նախագահ Գոռ Հակոբյանը։