1 րոպեի ընթերցում
Այս տարվա ապրիլից սկսվել և ընթանում են Գեղարքունիքի մարզի Սևան համայնքի տրանսպորտային հանգույցի հիմնանորոգման երկրորդ փուլի աշխատանքները։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից, Սևանի տրանսպորտային հանգույցի հիմնանորոգման առաջին փուլն իրականացվել էր 2024 թվականին։ Երթևեկության մեծ ինտենսիվություն ունեցող կամուրջը տասնամյակներ շարունակ չէր նորոգվել, և կամրջի կոնստրուկցիաները սկսել էին քայքայվել։ Անցած տարի պետական միջոցներով հիմնանորոգվել էր մոտ 30 մետր երկարությամբ կամրջի երթևեկության մի ուղղությունը՝ 16.76 մետր լայնությամբ։ Իսկ այս տարի հիմնանորոգվում է կամրջի երկրորդ՝ Սևանից դեպի Երևան ուղղությունը՝ դարձյալ 16.76 մետր լայնությամբ։ Կամրջի վրա նորոգվելու են միացման կարերը, կատարվելու է երկշերտ ջրամեկուսացում, բետոնապատում, տեղադրվելու է երկշերտ ասֆալտբետոնե ծածկ։ Նախատեսված է մայթերի կառուցում և բազրիքների տեղադրում, այլ աշխատանքներ։
Հիմնանորոգումն իրականացվում է պետական բյուջեի միջոցներով, 107 միլիոն 125 հազար դրամ արժեքով։ Շինարարությունը նախատեսված է ավարտել այս տարվա ընթացքում։