ՔՊ խմբակցության պատգամավոր Արուսյակ Ջուլհակյանն անդրադարձել է ՀՀ նախկին նախագահ Քոչարյանի՝ իշխանություններին ուղղված մեղադրանքին
2 րոպեի ընթերցում
ՀՀ Ազգային ժողովի «Քաղաքացիական պայմանագիր» խմբակցության պատգամավոր, ԱԺ պետական-իրավական հարցերի մշտական հանձնաժողովի փոխնախագահ ու Եվրոպայի խորհրդի խորհրդարանական վեհաժողովի փոխնախագահ Արուսյակ Ջուլհակյանը «Ֆեյսբուք»-ի իր էջի գրառմամբ անդրադարձել է ՀՀ նախկին նախագահ Ռոբերտ Քոչարյանի հայտարարությանը, թե ներկայիս «Հայաստան» համահայկական հիմնադրամից 100 մլն դոլար է փոխանցվել պետբյուջե, որ իշխանությունները յուրացրել են։
«Արմենպրես»-ի հաղորդմամբ՝ գրառման մեջ ասվում է. «Երեկ Ռոբերտ Քոչարյանն իր «Կոռուպցիոն բանջար» օպերացիայի շրջանակներում իշխանություններին մեղադրեց նաև Համահայկական հիմնադրամից 100 մլն դոլար պետբյուջե փոխանցելու և այդ գումարները «ուտելու» համար:
«Հայաստան» խմբակցության սիրելի առաջնորդին հիշեցնեմ, որ 2021 թվականին այդ նույն «Հայաստան» խմբակցության պատգամավորների նախաձեռնությամբ Ազգային ժողովում ձևավորվեց քննիչ հանձնաժողով՝ հիմնադրամի կողմից հավաքագրված և Հայաստանի Հանրապետության պետական բյուջե փոխանցված միջոցների օգտագործումը ուսումնասիրելու համար: Կես տարի նիստեր արեցինք, հրավիրեցինք տարբեր պաշտոնյաների: Եվ ի՞նչ: Եվ ոչինչ:
Առ այսօր նույնիսկ զեկույց չի տվել այդ հանձնաժողովը, որտե՞ղ են Քոչարյանի բարձրաձայնած չարաշահումները: Վստահ եմ՝ հանրության տեղեկացված լինելու իրավունքով մտահոգ մեր լրատվամիջոցները կուղղեն այս հարցը Քոչարյանի պատգամավորներին: Վերջ ի վերջո՝ ի՞նչ բացահայտեցին վերջիններս քննիչ հանձնաժողովի աշխատանքների շրջանակներում»։