2 րոպեի ընթերցում
Գեղարքունիքի մարզում մայիսի 3-ին ժամը 9:30-ից մեկնարկել են համապետական շաբաթօրյակի աշխատանքները։ Ինչպես «Արմենպրես»-ի թղթակցին տեղեկացրին Գեղարքունիքի մարզպետի աշխատակազմից, մարզի համայնքներում շաբաթօրյակին ներգրավվել է 456 կազմակերպություն, 35 հազար 66 մասնակից, որոնցից 17 հազար 405-ը մարզային ենթակայության հանրակրթական դպրոցների աշխատակիցներ և բարձր դասարանների աշակերտներ, 926-ը՝ մարզային ենթակայության բուժհիմնարկների աշխատակիցներ, մնացածը՝ ՀՀ գործադիր մարմինների տարածքային ստորաբաժանումների, մասնավոր ձեռնարկությունների, կազմակերպությունների ներկայացուցիչներ, քաղաքացիներ։
Գործի է դրվել շուրջ 91 միավոր տեխնիկա, 3830 գործիք։
Համապետական շաբաթօրյակի աշխատանքները համակարգում է ՀՀ Գեղարքունիքի մարզպետի որոշմամբ մարզպետի աշխատակազմում ձևավորված աշխատանքային խումբը։ Մարզպետի աշխատակազմի ստորաբաժանումների աշխատակիցները ամրակցված են և վերահսկում են մարզի բոլոր համայնքներում և բնակավայրերում իրականացվող աշխատանքների ընթացքը։
Կենցաղային աղբի թափոններից մաքրվում են բնակավայրերի փողոցները, հիմնարկ-ձեռնարկությունների բակերը, միջազգային, հանրապետական, մարզային ու համայնքային նշանակության ճանապարհների եզրերը, հուշարձանների, աղբավայրերի, ինչպես նաև՝ Սևանա լճի ափամերձ ու անտառամարձ տարածքները։