Մակրոնը խոստացել է ուժեղացնել ճնշումը Ռուսաստանի վրա Ուկրաինայում հրադադարի հասնելու համար
2 րոպեի ընթերցում
Ֆրանսիայի նախագահ Էմանուել Մակրոնը հայտարարել է, որ Արևմուտքը մոտ ապագայում կուժեղացնի ճնշումը Ռուսաստանի վրա՝ Ուկրաինայում հրադադար հաստատելու համար։ «Արմենպրես»-ի փոխանցմամբ՝ այս մասին նա ասել է Paris-Match հանդեսին տված հարցազրույցում:
«Մենք կմեծացնենք ճնշումը Ռուսաստանի վրա», - ասել է Մակրոնը։
Ֆրանսիայի ղեկավարի խոսքով՝ դա տեղի կունենա «առաջիկա ութից տասն օրվա ընթացքում»։ Նա կարծում է, որ իրեն հաջողվել է համոզել ամերիկյան կողմին Մոսկվայի նկատմամբ «սպառնալիքների և, գուցե, պատժամիջոցների սրման» հնարավորության հարցում, որպեսզի Կրեմլը դրդված լինի դադարեցնել կրակը։
«Առաջիկա երկու շաբաթը վճռորոշ կլինի այդ հրադադարին հասնելու փորձերի համար», - ասել է Մակրոնը։
Նա հրատարակությանը հայտնել է ԱՄՆ նախագահ Դոնալդ Թրամփի հետ լույս ապրիլի 24-ի գիշերը կայացած զրույցի մասին, որի ընթացքում նա փորձել է Սպիտակ տան ղեկավարին դրդել «ավելի կոշտ դիրք բռնել» Ռուսաստանի հետ հարաբերություններում։
Անդրադառնալով ապրիլի 26-ին Վատիկանում Հռոմի Ֆրանցիսկոս պապի հուղարկավորության ժամանակ ԱՄՆ նախագահ Դոնալդ Թրամփի և Ուկրաինայի նախագահ Վոլոդիմիր Զելենսկիի հանդիպմանը՝ Մակրոնն ասել է, որ այդ զրույցի շնորհիվ է հաջողվել «ճնշումն ուղղել Ռուսաստանի վրա»։
«Սա պահանջվող նպատակն է, քանի որ ճիշտ չէր լինի, եթե ճնշում գործադրվեր միայն Ուկրաինայի վրա», - բացատրել է Ֆրանսիայի նախագահը։