Մոնտեվիդեոյի «Հայաստան» հրապարակում անցկացվել է Հայոց ցեղասպանության 110-րդ տարելիցի ոգեկոչման արարողություն
2 րոպեի ընթերցում
Ուրուգվայում Հայաստանի Հանրապետության դեսպան Մարիամ Գևորգյանը մասնակցել է Մոնտեվիդեոյի «Հայաստան» հրապարակում Հայոց ցեղասպանության 110-րդ տարելիցի ոգեկոչման արարողությանը և ծաղկեպսակ զետեղել Հայոց ցեղասպանության զոհերի հիշատակը հավերժացնող խաչքարի մոտ:
«Արմենպրես»-ի հաղորդմամբ՝ այս մասին նշված է Ուրուգվայում ՀՀ դեսպանության տարածած հաղորդագրության մեջ։
Նշվում է, որ միջոցառմանը ներկա են գտնվել Ուրուգվայի փոխնախագահ, Գլխավոր Ասամբլեայի և Սենատորների պալատ նախագահ Կարոլինա Կոսսեն, Ներկայացուցիչների պալատի նախագահ Սեբաստիան Վալդոմիրը, Ուրուգվայի նախկին նախագահ Լուիս Լակաժե Էռեռան, Արտաքին հարաբերությունների նախարարի տեղակալ Վալերիա Սուկասին, գործադիր և օրենսդիր մարմինների անդամներ, երկրում հավատարմագրված օտարերկրյա դիվանագիտական ներկայացուցչությունների ղեկավարներ և անդամներ, Ուրուգվայի Հայ Առաքելական, Կաթոլիկ և Ավետարանական եկեղեցիների հոգևոր առաջնորդները, ուրուգվայահայ համայնքի մի շարք ներկայացուցիչներ, Մոնտեվիդեոյի՝ «Հայաստան» անունը կրող թիվ 156 դպրոցի ղեկավար կազմն ու աշակերտները:
Միջոցառման հիմնական բանախոսը արտաքին հարաբերությունների նախարարի տեղակալ Վալերիա Սուկասին էր, որն անդրադարձել է Հայոց ցեղասպանության դրվագներին և դրան հաջորդած ժամանակահատվածում հայերի ներգաղթին Ուրուգվայ, ինչպես նաև՝ Ուրուգվայի կողմից Հայոց ցեղասպանության ճանաչմանը, բարձր գնահատել հայ համայնքի դերը երկրի զարգացման գործում, շեշտել հայ-ուրուգվայական հարաբերությունների բարեկամական բնույթն ու դրանց շարունակական ամրապնդումը:
«Ուրուգվայը Հայաստանին և հայ ժողովրդին մաղթում է զարգացում և բարեկեցություն՝ տարածաշրջանային խաղաղության և կայունության շրջանակներում՝ հիմնված ՄԱԿ-ի կանոնադրության հարգման վրա, ներառյալ՝ Հայաստանի տարածքային ամբողջականության հարգումը միջազգայնորեն ճանաչված սահմաններին համապատասխան»,-ընդգծել է Վալերիա Սուկասին:
Միջոցառումը կազմակերպել է Ուրուգվայի հայկական բազմաինստիտուցիոնալ կազմակերպությունը: