Ֆրանսիայում հավաստիացրել են, որ Եվրոպան պնդում է Ուկրաինայի տարածքային ամբողջականության պահպանումը

Եվրոպական երկրներն, արձագանքելով ռուս-ուկրաինական հակամարտության կարգավորման համար Ուկրաինայի տարածքային զիջումների վերաբերյալ ԱՄՆ փոխնախագահ Ջեյ Դի Վենսի՝ Փարիզում հնչեցրած հայտարարությանը, նշել են ուկրաինական պետության ամբողջականության պահպանման անհրաժեշտությունը: «Արմենպրես»-ի հաղորդմամբ՝ այս մասին հայտնել են Ֆրանսիայի նախագահի աշխատակազմում:

«Տարածքային ամբողջականությունը և Եվրոպայի մաս լինելու ճանաչումը եվրոպացիների շատ կարևոր պահանջներն են»,- նշել են Ելիսեյան պալատում։

Ֆրանսիայի նախագահի աշխատակազմում ընդգծել են ընդհանուր մոտեցման մշակման կարևորությունը, որը ԱՄՆ կարող է ներկայացնել ռուսական կողմին։

Ավելի վաղ հաղորդվել էր, որ Միացյալ Նահանգների փոխնախագահը հայտարարել է Ուկրաինայում հակամարտությունն անհապաղ դադարեցնելու և այն շփման գծի ներկայիս երկայնքով ​​սառեցնելու անհրաժեշտության մասին։

«Կարծում եմ, հասել է եթե ոչ եզրափակիչ, ապա բառի լայն իմաստով վերջին քայլերից մեկին անցնելու ժամանակը, երբ կողմերը կհայտարարեն մարտերը դադարեցնելու, ներկայիս բաժանարար գծերը սառեցնելու մասին»,- հայտարարել էր Վենսը։

Նա պարզաբանել էր, որ այս տարբերակը ենթադրում է թե՛ Ռուսաստանի, թե՛ Ուկրաինայի պատրաստակամությունը գնալ որոշակի տարածքային զիջումների։