Մասկը մայիսից ավելի քիչ կաշխատի Թրամփի վարչակազմում՝ ավելի շատ ժամանակ նվիրելով իր ընկերություններին

Ամերիկացի միլիարդատեր Իլոն Մասկը հայտարարել է, որ մայիսից սկսած կտրուկ կկրճատի ԱՄՆ նախագահ Դոնալդ Թրամփի վարչակազմի Կառավարության արդյունավետության վարչությունում (DOGE) աշխատելու ժամանակը և մեծամասամբ կվերադառնա իր ընկերությունների կառավարմանը: «Արմենպրես»-ի փոխանցմամբ՝ այս մասին հայտնում է BBC-ին։

Մասկի ամենախոշոր ընկերությունը՝ Tesla-ն, հայտնել է այս տարվա առաջին եռամսյակի արդյունքները, որոնք ցույց են տվել, որ ընկերության զուտ շահույթը տարեկան կտրվածքով նվազել է 71%-ով: 2025 թ. հունվար-մարտ ամիսներին Tesla-ն վաճառել է գրեթե 337 000 էլեկտրամեքենա, ինչն ընկերության վատագույն եռամսյակային արդյունքն է ավելի քան երկու տարվա ընթացքում։ 

«Աշխատանքի հիմնական մասը՝ DOGE-ի թիմի կազմավորումը և ֆինանսական կարգուկանոն հաստատելու հարցում կառավարության հետ փոխգործակցությունն արդեն հիմնականում արված է», - վերլուծաբանների հետ հեռախոսային կոնֆերանսի ժամանակ Մասկի խոսքը մեջբերել է Reuters-ը:

Միևնույն ժամանակ Իլոն Մասկը չի պատրաստվում ամբողջովին հեռանալ DOGE-ից. նա հայտնել է, որ նախատեսում է իր ժամանակի 40%-ը հատկացնել վարչությանը։

Գործարարը նշել է, որ կշարունակի աշխատել DOGE-ի թիմի հետ մինչև Դոնալդ Թրամփի նախագահության ժամկետի ավարտը՝ ապահովելու, որ «շռայլություններն ու խարդախությունները» չվերադառնան:

Մասկը նաև հավելել է, որ մտադիր է շաբաթական մեկ կամ երկու օր հատկացնել կառավարության խնդիրներին, «քանի դեռ նախագահը դա ցանկանում է»:

Իլոն Մասկի դերը Կառավարության արդյունավետության վարչությունում, որտեղ նա փորձում է կրճատել դաշնային կառավարության աշխատատեղերը հունվարին Թրամփի իշխանության գալուց ի վեր, լուրջ դժգոհության առիթ է դարձել, ինչի պատճառով Tesla-ի խանութները վանդալիզմի են ենթարկվել: