Ճապոնիան հայտարարել է Ուկրաինային ՆԱՏՕ-ի կողմից ցուցաբերվող օգնությանը մասնակցելու պատրաստակամության մասին
1 րոպեի ընթերցում
Ճապոնիան պատրաստ է մասնակցել ՆԱՏՕ-ի նախաձեռնություններին՝ զորավարժությունների և սարքավորումների մատակարարման միջոցով Ուկրաինային օգնություն տրամադրելու ուղղությամբ։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտարարել է Ճապոնիայի պաշտպանության նախարար Գեն Նակատանին ՆԱՏՕ-ի գլխավոր քարտուղար Մարկ Ռյուտեի հետ հանդիպման ժամանակ։
Նակատանին նշել է, որ Ճապոնիայի շուրջ անվտանգության իրավիճակը գնալով բարդանում է։ Կողմերը հաստատել են իրենց մտադրությունը զարգացնել համագործակցությունը Ճապոնիա-ՆԱՏՕ Անհատական գործընկերության ծրագրի շրջանակում, ինչպես նաև տիեզերքի ու կիբերտարածության և կեղծ տեղեկատվության դեմ պայքարի ոլորտներում:
Նակատանիի հետ հանդիպելուց առաջ Ռյուտեն այցելել է Տոկիոյի հարևան Կանագավա պրեֆեկտուրայում գտնվող Յոկոսուկա ծովային ինքնապաշտպանական ուժերի բազա և զրուցել զինվորական անձնակազմի հետ: Նա նաև ցանկություն է հայտնել զարգացնել ՆԱՏՕ-Ճապոնիա համագործակցությունը ռազմական արդյունաբերության ոլորտում։
Ապրիլի 9-ին Ռյուտեն կհանդիպի Ճապոնիայի վարչապետ Շիգերու Իշիբայի հետ։