«Հեզբոլլահ»-ը հերքել է իր առնչությունը սիրիա-լիբանանյան սահմանին սիրիացի 3 զինվորի սպանությանը
2 րոպեի ընթերցում
Լիբանանյան «Հեզբոլլահ» շարժման անդամները հերքել են իրենց մասնակցությունը սիրիա-լիբանանյան սահմանին երեք սիրիացի զինվորի սպանությանը, որի պատճառով Սիրիան հարվածներ է հասցրել Լիբանանում «Հեզբոլլահ»-ի դիրքերին։ «Արմենպրես»-ի փոխանցմամբ՝ այս մասին հայտնում է Syria TV-ին
«Հեզբոլլահ»-ի հանրային կապերի վարչությունը հայտարարություն է տարածել, որում ասվում է. «Մենք կրկնում ենք այն, ինչ նախկինում բազմիցս հայտարարել ենք, որ «Հեզբոլլահ»-ը որևէ առնչություն չունի սիրիական տարածքում տեղի ունեցող իրադարձությունների հետ»։
Մարտի 16-ին Սիրիայի պաշտպանության նախարարությունը հայտնել էր, որ «Հեզբոլլահ»-ի անդամները դարանակալել են Հոմսի արևմուտքում՝ Զայթա սահմանային գյուղի մոտ, որտեղ առևանգել են սիրիական բանակի երեք զինվորականի, նրանց տարել Լիբանանի տարածք ու սպանել։
Ի պատասխան դրա՝ սիրիական բանակի հրետանին թիրախավորել է «Հեզբոլլահ»-ի դիրքերը Լիբանանի սահմանին, իսկ Պաշտպանության նախարարությունը մեծ ռազմական ուժեր է ուղարկել երկու երկրների սահման՝ անվտանգությունը պահպանելու և ցանկացած նոր սպառնալիքի դեմ պայքարելու համար:
Իր հերթին, Լիբանանի ազգային լրատվական գործակալությունը հայտնել է, որ լիբանանյան բանակը Կարմիր խաչի միջոցով երեք զինվորականների դիակները հանձնել է Ջուսիա/Ալ-Կաա սահմանային անցակետում գտնվող Սիրիայի անվտանգության ծառայողներին:
Լիբանանյան ԶԼՄ-ները հաղորդում են սահմանամերձ քաղաքներից դեպի Հերմելի շրջան տեղահանումների զանգվածային ալիքի մասին՝ սիրիական սահմանին հարող շրջանների ուժեղացված գնդակոծությունների հետևանքով:
Մարտի 16-ի միջադեպը տեղի է ունեցել Սիրիայի և Լիբանանի միջև սահմանային լարվածության սրման ֆոնին, որտեղ նախորդ ամիս բախումներ էին տեղի ունեցել սիրիական բանակի և երկու երկրների սահմանային շրջաններում բնակվող թմրանյութերի ու զենքի մաքսանենգությամբ զբաղվող լիբանանյան խմբերի միջև: