Արարատ Միրզոյանը մանրամասներ է ներկայացրել Սուբրամանյամ Ջայշանկարի հետ ունեցած հանդիպման վերաբերյալ

Հայաստանի Հանրապետության արտաքին գործերի նախարար Արարատ Միրզոյանը մանրամասներ է ներկայացրել Հնդկաստանի ԱԳ նախարար Սուբրամանյամ Ջայշանկարի հետ ունեցած հանդիպումից։

«Արմենպրես»-ի հաղորդմամբ՝ այս մասին ԱԳ նախարար Արարատ Միրզոյանը գրառում է կատարել X-ի իր միկրոբլոգում՝ միաժամանակ շնորհակալություն հայտնելով իր հնդիկ գործընկերոջը Հնդկաստանում հայկական պատվիրակությանը ցուցաբերած ջերմ վերաբերմունքի համար։

«Շնորհակալություն նախարար Սուբրամանյամ Ջայշանկարին Դելիում ինձ և իմ պատվիրակությանը ցուցաբերած ջերմ ընդունելության և հյուրընկալության համար: 

Մենք բեղմնավոր քննարկում ունեցանք մեր երկկողմ օրակարգի առանցքային թեմաների շուրջ՝ անդրադառնալով մեր ձեռք բերած նշանակալի առաջընթացին և նախանշելով Հայաստան-Հնդկաստան գործընկերության հետագա խորացման ուղիները»,-նշել է Միրզոյանը՝ գոհունակություն հայտնելով գործընկերոջ հետ քննարկման վերաբերյալ նաև տարածաշրջանային և միջազգային զարգացումների շուրջ։

Հայաստանի ԱԳ նախարար Արարատ Միրզոյանի հետ հանդիպումից հետո գրառում է կատարել նաև Հնդկաստանի ԱԳ նախարար Սուբրամանյամ Ջայշանկարը՝ ողջունելով հայկական պատվիրակությանը Դելիում։

Հնդկաստանի ԱԳ նախարարը մանրամասնել է, որ հանդիպմանը քննարկվել են առևտրի, ներդրումների, կրթության, կապի և մշակույթի զարգացման վերաբերյալ հարցեր: 

«Մտքեր ենք փոխանակել նաև գլոբալ և տարածաշրջանային վերջին զարգացումների հեռանկարների շուրջ»,-նշել է Սուբրամանյամ Ջայշանկարը։

Pleased to welcome FM @AraratMirzoyan of Armenia this evening in Delhi.

Productive discussions on advancing trade, investment, education, connectivity, mobility & culture.

Also shared perspectives on the recent global and regional developments.

🇮🇳 🇦🇲 pic.twitter.com/Veiu2gaxwQ

— Dr. S. Jaishankar (@DrSJaishankar) March 10, 2025

ՀՀ ԱԳ նախարար Արարատ Միրզոյանը մարտի 10-ին պաշտոնական այցով մեկնել է Հնդկաստան։ 

Նյու Դելի պաշտոնական այցի մեկնարկին ՀՀ ԱԳ նախարար Արարատ Միրզոյանը ելույթով հանդես է եկել Համաշխարհային հարցերով հնդկական խորհրդում (ICWA):

Այնուհետև կայացել է Հայաստանի ԱԳ նախարար Արարատ Միրզոյանի և Հնդկաստանի ԱԳ նախարար Սուբրամանյամ Ջայշանկարի առանձնազրույցը, որին հաջորդել է նախարարների ղեկավարած պատվիրակությունների՝ ընդլայնված կազմով հանդիպումը։ 

Արարատ Միրզոյանի և Սուբրամանյամ Ջայշանկարի հանդիպման արդյունքներով ստորագրվել են երկկողմ համագործակցությունն ընդլայնող մի շարք փաստաթղթեր։