Իշխանությունը ԵՄ–ին անդամակցելու գործընթացի մեկնարկի օրենքի նախագծին կողմ քվեարկելու որոշում ունի. ԱԺ նախագահ
2 րոպեի ընթերցում
Ազգային ժողովի «Քաղաքացիական պայմանագիր» խմբակցությունը «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագծին կողմ քվեարկելու որոշում ունի, իշխանությունը մտադիր է այն ընդունել:
«Արմենպրես»-ի հաղորդմամբ՝ այս մասին լրագրողների հետ զրույցում վստահեցրեց ԱԺ նախագահ Ալեն Սիմոնյանn՝ անդրադառնալով հանձնաժողովի նիստում նախագծի քվեարկության հետաձգմանը:
Սիմոնյանը վստահեցրեց, որ դա ոչ մի աշխարհաքաղաքական հարցով պայմանավորված չէ:
Անդրադառնալով հարցին, թե իշխանությունը մտադի՞ր է դա ընդունել՝ նա ասաց.
«Իհարկե, մտադիր է: Բացի տեխնիկականից, որևիցե հարց չկա»:
Պատասխանելով հնարավոր հետևանքների մասին մտահոգություններին, թե իբր Հայաստանը պետք է դրանից հետո ԵԱՏՄ–ից դուրս գա՝ Սիմոնյան ասաց.
«Այս փուլում որևիցե այլ տարբերակ ու այլ բան չի քննարկվում: Այս փուլում միայն դրան կողմ քվեարկելու որոշումը «Քաղաքացիական պայմանագիր»–ն ունի, և հաջորդիվ կքվեարկի կողմ»:
Ազգային ժողովը փետրվարի 12-ի նիստում առաջին ընթերցմամբ ընդունել էր «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը։
ԱԺ եվրոպական ինտեգրման հարցերի հանձնաժողովում մարտի 3–ին օրենքի նախագծի՝ երկրորդ ընթերցմամբ քվեարկությունը հետաձգվել էր՝ տեխնիկական պատճառներով: Այն նախատեսվում է հանձնաժողովի նիստում քննարկել ու քվեարկել առաջիկա օրերին: