368.59
Պուտինը հայտարարել է, որ ԱՄՆ վարչակազմի հետ առաջին շփումները «հույս են ներշնչում»
2 րոպեի ընթերցում
ԱՄՆ վարչակազմի հետ առաջին շփումները հույս են ներշնչում, սակայն այդ շփումները ոչ բոլորին են գոհացնում։ «Արմենպրես»-ի փոխանցմամբ՝ այս մասին փետրվարի 27-ին Մոսկվայում ՌԴ Անվտանգության դաշնային ծառայության (ԱԴԾ) կոլեգիայի նիստում հայտարարել է ՌԴ նախագահ Վլադիմիր Պուտինը։
«Ամերիկյան նոր վարչակազմի հետ առաջին շփումները մեզ որոշակի հույս են ներշնչում։ Փոխադարձ միտվածություն կա՝ աշխատելու միջպետական հարաբերությունների վերականգնման ուղղությամբ», - ասել է ՌԴ նախագահը։
Պուտինի խոսքով՝ ԱՄՆ-ում Ռուսաստանի Դաշնության ներկայիս գործընկերները ցուցաբերում են պրագմատիզմ և ցանկանում են հրաժարվել հին կաղապարներից ու կարծրատիպերից, որոնք հանգեցրել են միջազգային հարաբերությունների ճգնաժամի:
«Ոչ բոլորին է գոհացնում ռուս-ամերիկյան շփումների վերականգնումը։ Արևմտյան որոշ վերնախավեր դեռևս վճռական են աշխարհում անկայունությունը պահպանելու հարցում, և այդ ուժերը կփորձեն խաթարել սկսված երկխոսությունը», - ասել է Պուտինը:
Նա մատնանշել է դիվանագիտության և հատուկ ծառայությունների բոլոր հնարավորություններն օգտագործելու անհրաժեշտությունը նման փորձերը խափանելու համար։
Ռուսաստանի և ԱՄՆ-ի դեսպանատների աշխատանքի վերականգնման շուրջ բանակցությունները սկսվել են փետրվարի 27-ին ավելի վաղ: Դրանք արդեն շարունակվում են վեց ժամից ավելի։
Բաժանորդագրվեք մեր ալիքին Telegram-ում