2 րոպեի ընթերցում
Գեղարքունիքի մարզի Սևան համայնքի Դդմաշեն գյուղի մանկապարտեզը համալրվել է նոր գույքով։
Ինչպես «Արմենպրես»-ը տեղեկացավ Սևանի համայնքապետարանի աշխատակազմից, համայնքի ավագանու 2024 թվականի տարեվերջյան նիստում ընդունվել է համապատասխան որոշում՝ «Սևան համայնքի Դդմաշեն բնակավայրի մանկապարտեզ» ՀՈԱԿ-ում նոր խումբ ավելացնելու վերաբերյալ:
Նոր խմբի լիարժեք գործունեության համար չի ուշացել նաև անհրաժեշտ աջակցությունը:
«Ֆոքս օն չիլդրեն նաու» բարեգործական կազմակերպության հայաստանյան մասնաճյուղի աջակցությամբ և բարեգործական ծրագրերի շրջանակներում, համագործակցելով Սևանի համայնքապետարանի հետ, Դդմաշեն բնակավայրի մանկապարտեզի նոր խումբն իր լիարժեք գործունեության համար ապահովվել է անհրաժեշտ գույքով:
«Ֆոքս օն չիլդրեն նաու» կազմակերպության Հայաստանի մասնաճյուղի և «Սևան համայնքի Դդմաշեն բնակավայրի մանկապարտեզ» ՀՈԱԿ-ի միջև կնքված համագործակցության պայմանագրի շրջանակներում նախադպրոցական ուսումնական հաստատությունը համալրվել է երկհարկանի մահճակալներով, ներքնակներով, մանկական աթոռակներով և ճաշասեղաններով, հագուստի պահարաններով, խաղային կենտրոններով, հանդերձարանի նստարաններով, դաստիարակի աշխատասեղանով և աթոռներով, գրատախտակով, ինչպես նաև դիդակտիկ նյութերով: