2 րոպեի ընթերցում
Մյունխենի անվտանգության համաժողովին մեկնող ԱՄՆ պետքարտուղար Մարկո Ռուբիոյի ինքնաթիռը ստիպված է եղել վերադառնալ Վաշինգտոն մեխանիկական խնդիրների պատճառով։ «Արմենպրես»-ի փոխանցմամբ՝ այս մասին հաղորդում է Reuters գործակալությունը՝ վկայակոչելով Պետքարտուղարության խոսնակ Թեմի Բրյուսին։
«Պետքարտուղարը մտադիր է շարունակել իր ուղևորությունը Գերմանիա և Մերձավոր Արևելք այլ ինքնաթիռով», - հայտարարել է Բրյուսը։
Առայժմ հայտնի չէ՝ արդյոք Մարկո Ռուբիոն կհասցնի ներկա գտնվել ԱՄՆ փոխնախագահ Ջեյ Դի Վենսի և Ուկրաինայի նախագահ Վոլոդիմիր Զելենսկիի հանդիպմանը, որը պետք է տեղի ունենա փետրվարի 14-ին Մյունխենի անվտանգության համաժողովի շրջանակում։
Մեխանիկական խնդիրն, ըստ ԱՄՆ պաշտոնյաներից մեկի, կապված է եղել օդաչուների խցիկի դիմապակու ճեղքի հետ։ Ինքնաթիռը հետ է վերադարձել թռիչքից 90 րոպե անց և բարեհաջող վայրէջք է կատարել Էնդրյուս ավիաբազայում։
ԱՄՆ նախագահ Դոնալդ Թրամփն ավելի վաղ հայտարարել էր, որ ԱՄՆ բարձրաստիճան պաշտոնյաները Մյունխենի անվտանգության համաժողովի շրջանակում հանդիպում կունենան ռուսաստանցի պաշտոնյաների հետ, և որ այդ հանդիպմանը հրավիրված է նաև ուկրաինական կողմը։ Կիևը, սակայն, հրաժարվել է մասնակցել հանդիպմանը։