ՌԴ Պետդումայից հայտնում են, որ ՌԴ և ԱՄՆ նախագահների հանդիպումը կարող է կայանալ մոտ ժամանակներս

Ռուսաստանի նախագահ Վլադիմիր Պուտինի և ԱՄՆ նախագահ Դոնալդ Թրամփի հանդիպումը կարող է կայանալ մոտ ժամանակներս։ Ինչպես տեղեկացնում է «Արմենպրես»-ը, վկայակոչելով «Interfax»-ը, այս մասին հայտարարել է ՌԴ Պետդումայի միջազգային հարցերով հանձնաժողովի նախագահ Լեոնիդ Սլուցկին։

Սլուցկին նշել է, որ հանդիպումը կարող է կայանալ փետրվար-մարտ ամիսներին, սակայն դրա ստույգ ժամկետները դեռևս չեն հայտարարվում։

«Մենք չենք գուշակի, հնարավորություն կտանք առաջնորդներին գրագետ և համակողմանիորեն պատրաստվել հանդիպմանը, բայց այն շուտով կլինի»,-նշել է ռուս պաշտոնյան։

Նրա խոսքով՝ այս պահին հանդիպման նախապատրաստական գործընթացն առաջադեմ փուլում է, և բանակցությունների հավանականությունը 100 տոկոս է։

Սլուցկին ընդգծել է, որ Պուտինի և Թրամփի հանդիպումը մեծ նշանակություն կունենա համաշխարհային քաղաքականության համար։

«Հանդիպումը լուրջ նախապատրաստություն է պահանջում, սակայն վստահ եմ, որ այն կունենա կառուցողական հետևանքներ։ Առաջնային կքննարկվեն Ուկրաինայի, Մերձավոր Արևելքի և միջազգային հարաբերությունների հարցերը»,-ասել է Սլուցկին։

Նա հավելել է, որ Պուտին-Թրամփ հանդիպումը կարող է խորհրդանշական դառնալ և էական ազդեցություն ունենալ համաշխարհային քաղաքականության ընթացքի վրա։