2 րոպեի ընթերցում
ԱՄՆ նորընտիր նախագահ Դոնալդ Թրամփն իր պաշտոնավարման առաջին օրն ավելի քան 200 հրամանագիր կստորագրի, որոնք վերաբերում են էներգետիկային, սահմանային ու միգրացիոն քաղաքականությանը: «Արմենպրես»-ի փոխանցմամբ՝ այդ մասին հայտնել են Fox News Digital-ի աղբյուրները։
Իրավիճակին ծանոթ ամերիկացի պաշտոնյայի խոսքով՝ Թրամփը կհրապարակի «գործադիր հրամանագրերի և գործողությունների պատմական շարք, որոնք արմատապես կբարեփոխեն ԱՄՆ-ի կառավարությունը»։
Մասնավորապես, ինչպես հաղորդել է աղբյուրը, Թրամփն արտակարգ դրություն կհայտարարի պետական սահմանին, ԱՄՆ-ի զինվորականներին կհրահանգի համագործակցել ներքին անվտանգության նախարարության հետ՝ հարավային սահմանին կարգուկանոն ապահովելու համար և կհայտարարի բոլոր անօրինական ներգաղթյալների համար սահմանը փակելու մասին:
Նորընտիր նախագահը մտադիր է նարկոկարտելները հայտարարել օտարերկրյա ահաբեկչական կազմակերպություններ, ինչը, պաշտոնյայի խոսքով, նոր հնարավորություններ կբացի ազգային անվտանգության ապահովման համար:
Բացի այդ, Թրամփը պլանավորում է վերականգնել Մեքսիկայում մնալու քաղաքականությունը և զինվորականներին կարգադրել սահմանային պատի նոր հատված կառուցել։
Վաշինգտոնում հանրահավաքի ժամանակ հանդես գալով կողմնակիցների առջև՝ Թրամփը հայտնել է, որ պլանավորում է բազմաթիվ հրամանագրեր ստորագրել նախագահի պաշտոնն ստանձնելու առաջին օրը:
«Բայդենի վարչակազմի յուրաքանչյուր արմատական և հիմար գործադիր հրաման կչեղարկվի իմ երդմնակալությունից հետո մի քանի ժամվա ընթացքում», - հայտարարել է Թրամփը։
Թրամփի երդմնակալությունը տեղի կունենա հունվարի 20-ին։