1 րոպեի ընթերցում
ԵՐԵՎԱՆ, 28 ՆՈՅԵՄԲԵՐԻ, ԱՐՄԵՆՊՐԵՍ: Ռուսաստանը տասն անգամ ավելի շատ հրթիռներ է արտադրում, քան ՆԱՏՕ-ի բոլոր երկրները միասին։ Ընդ որում, Մոսկվան հաջորդ տարվանից այդ արկերի թողարկումը կավելացնի ևս մեկ քառորդով։ «Արմենպրես»-ի փոխանցմամբ՝ այս մասին հայտարարել է ՌԴ նախագահ Վլադիմիր Պուտինը Աստանայում անցկացվող ՀԱՊԿ գագաթնաժողովում։
«Ինչ վերաբերում է համապատասխան հրթիռային համակարգերի և համապատասխան տեխնիկայի արտադրությանը, ապա Ռուսաստանում այն 10 անգամ ավելի է, քան ՆԱՏՕ-ի բոլոր երկրների միագումար արտադրությունը միասին վերցված։ Հաջորդ տարի այդ արտադրությունը կավելացվի ևս 25-30 տոկոսով», - Պուտինի խոսքերն է մեջբերում ՏԱՍՍ-ը։
Միևնույն ժամանակ ՌԴ նախագահն ընդգծել է, որ Ռուսաստանի տարածքին հարվածները, այդ թվում՝ արևմտյան զենքով, երբեք անպատասխան չեն մնա։
«Մեր կողմից հարվածները տեղի են ունեցել ի պատասխան ամերիկյան ATACMS հրթիռներով Ռուսաստանի տարածքին հասցվող չդադարող հարվածների: Ինչպես արդեն բազմիցս ասել եմ, մեր կողմից պատասխանը միշտ կլինի»,- հայտարարել է նա: