Թրամփն ակնկալում է, որ հեռախոսազրույց կունենա Պուտինի հետ

ԵՐԵՎԱՆ, 8 ՆՈՅԵՄԲԵՐԻ, ԱՐՄԵՆՊՐԵՍ։ ԱՄՆ ընտրված նախագահ Դոնալդ Թրամփը ենթադրել է, որ հեռախոսազրույց կունենա ՌԴ նախագահ Վլադիմիր Պուտինի հետ։ «Արմենպրես»-ի փոխանցմամբ՝ այս մասին հայտնել է NBC News-ի լրագրողը Թրամփի հետ բացառիկ հարցազրույցից հետո։

Թրամփը լրագրող Քրիսթեն Ուելքերին հայտնել է, որ իր ընտրվելուց հետո խոսել է աշխարհի շուրջ 70 ղեկավարի հետ։

«Նա ասաց, որ դեռ չի զրուցել նախագահ Պուտինի հետ, բայց ակնկալում է, որ կխոսի», - նշում է լրագրողը՝ հիշեցնելով, որ Դոնալդ Թրամփը զրուցել է նաև Ուկրաինայի նախագահ Վոլոդիմիր Զելենսկիի հետ։

NBC News-ի լրագրողը հիշեցնում է, որ Թրամփը բազմիցս ասել է, որ 24 ժամում վերջ կդնի Ռուսաստանի և Ուկրաինայի միջև հակամարտությանը, ինչը, շատերի կարծիքով, նշանակում է, որ Ուկրաինան ստիպված կլինի որոշ տարածքներ զիջել։ Թրամփը հրաժարվել է ասել՝ արդյոք հավատում է, որ կարող է իրագործել իր ասածը։