2 րոպեի ընթերցում
ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ: ԱՊՀ երկրներն սկսել են մշակել մինչև 2030 թվականը ռազմական ոլորտում համագործակցության հայեցակարգի նախագիծը՝ աշխարհում իրադրության սրման պատճառով։ «Արմենպրես»-ի փոխանցմամբ՝ այդ մասին հայտարարել է Համագործակցության գլխավոր քարտուղար Սերգեյ Լեբեդևը ԱՊՀ անդամ պետությունների անվտանգության խորհուրդների քարտուղարների՝ Մոսկվայում կայացած նիստում։
«Մենք ապրում ենք ամբողջ աշխարհակարգի փոխակերպման դժվարին ժամանակներ: Ծագել են նոր և վերսկսվել նախկին զինված հակամարտությունները, ծայրաստիճան սրվել են դաշինքային և պետությունների միջև դիմակայությունները: Այդ ամենը Միացյալ Նահանգների և ՆԱՏՕ-ի կողմից գլոբալ իշխման հետևանքն է: Ակնհայտ է, որ ներկայիս իրավիճակում կարևոր կայունացնող գործոն է համագործակցության ուժեղացումը ռազմական անվտանգության ոլորտում։ Մենք ԱՊՀ-ում ձեռնամուխ ենք լինում մինչև 2030 թվականը ռազմական համագործակցության հայեցակարգի նախագծի մշակմանը, որտեղ կնշենք փոխազդեցության հստակ առաջնահերթություններն ու նոր կողմնորոշիչները», - նրա խոսքերն է փոխանցում ՏԱՍՍ-ը։
Լեբեդևի խոսքով՝ ԱՊՀ-ն հիմնվում է այն բանի վրա, որ անդամ երկրների «զինված ուժերի մարտական և մարտավարական-տեխնիկական պատրաստությունը պետք է իրականացվի առկա գործնական փորձի և գիտական նվաճումների փոխադարձ հարստացման հիման վրա»։
Գլոբալ անվտանգության համակարգի վերացումը կենսականորեն անհրաժեշտ է դարձրել ԱՊՀ երկրների հավաքական և ազգային անվտանգության ամրապնդումը, կարծում է Լեբեդևը: