Լոռու և Տավուշի մարզերում հեղեղումների հետևանքով վնասված հիմնական ենթակառուցվածքները վերականգնվել են

ԵՐԵՎԱՆ, 4 ՆՈՅԵՄԲԵՐԻ, ԱՐՄԵՆՊՐԵՍ։ Տարածքային կառավարման և ենթակառուցվածքների նախարար Գնել Սանոսյանն անդրադարձավ Լոռու և Տավուշի մարզերում տեղի ունեցած հեղեղումների հետևանքով առաջացած վնասների վերականգնման աշխատանքներին:

«Արմենպրես»-ի հաղորդմամբ՝ ԱԺ հանձնաժողովների համատեղ նիստում 2025 թվականի պետական բյուջեի մասին օրենքի նախագծի նախնական քննարկումների ժամանակ նախարարը նշեց, որ կառավարության աշխատանքները բաժանվել են կարճաժամկետ, միջնաժամկետ և երկարաժամկետ փուլերի։ Նրա խոսքով՝ կարճաժամկետ փուլում փորձում են հնարավորինս արագ վերականգնել ենթակառուցվածքները: «Հիմա կարճաժամկետ փուլում ենք, և մի շարք ենթակառուցվածքներ արդեն ժամանակավոր վերականգնված են, այդ թվում՝ ճանապարհները և ժամանակավոր կամուրջները»,- ասաց նա:

Նախարարը շեշտեց, որ զուգահեռաբար իրականացվում են նաև երկարաժամկետ ծրագրեր, օրինակ՝ պատվիրել են Ասիական զարգացման բանկի կողմից Դեբետի ավազանի ամբողջական ուսումնասիրություն, որի արդյունքում փոփոխություններ կկիրականացվեն մի շարք հիմնական ենթակառուցվածքներում և համապատասխան պաշտպանական աշխատանքներ կձեռնարկվեն:

«Նույնն արել ենք M4 ճանապարհի Դիլիջան-Իջևան հատվածի հետ կապված, որտեղ արդեն մրցույթով պատվիրել ենք ուսումնասիրություն իրականացնող ընկերություն, որպեսզի մեզ առաջարկի համապատասխան լուծումներ»,- ավելացրեց նա: 

Նախարարը նաև տեղեկացրեց, որ ժամանակավոր կամուրջների տեղադրման գործընթացը ընթացքի մեջ է, և արդեն վերականգնվել են հեղեղումների հետևանքով վնասված հիմնական ենթակառուցվածքները, բոլոր տուժած բնակավայրերի հետ կապը վերականգնվել է: 

«Շարունակում ենք բարելավել ժամանակավոր ենթակառուցվածքները, և արդեն ունենք բնակավայրեր, որոնք հիմա օգտվում են նոր կամուրջներից»,- եզրափակեց նա։