Մարիաննա Շահպարոնյանը Փարիզում ներկայացրել է «Դեպի Հայաստան» գիրքը

ԵՐԵՎԱՆ, 16 ՀՈԿՏԵՄԲԵՐԻ, ԱՐՄԵՆՊՐԵՍ: Փարիզում գործող Սուրբ Մարիամ Աստվածածին Հայաստանյայց Առաքելական Եկեղեցում տեղի է ունեցել հայրենադարձ բանաստեղծուհի, «Դեպի Հայաստան» համահայկական-հասարակական կազմակերպության հիմնադիր-տնօրեն Մարիաննա Շահպարոնյանի գրքի շնորհանդեսը:

Մարիաննա Շահպարոնյանը ներկայացրեց իր ստեղծագործությունները փարիզյան հանդիսատեսին: Համայնքի ներկայացուցիչները բարձր գնահատեցին գիրքը՝ նշելով դրա զգացմունքային խորությունը և Հայաստանի ու սփյուռքի միջև կապի յուրահատուկ մեկնաբանումը:

«Դեպի Հայաստան» գիրքը, որը գրվել է 44-օրյա պատերազմի ծանր ժամանակաշրջանում, արտացոլում է հեղինակի խորը ապրումները հայրենիքի և նրա պատմության վերաբերյալ: Փարիզյան շնորհանդեսը դարձավ կարևոր քայլ՝ Ֆրանսահայերի և Հայաստանի միջև մշակութային կապերի ամրապնդման գործում:

«Իմ գրքի շնորհանդեսը Փարիզում անչափ տպավորիչ էր: Ջերմ ու բարեկամական մթնոլորտը, ինչպես նաև սփյուռքի անդամների հետաքրքրվածությունն ու աջակցությունը նորից ինձ ցույց տվեցին, թե որքան զորավոր է մեր համայնքը: Մարդիկ այստեղ պահպանում են իրենց ինքնությունն ու մշակույթը՝ միաժամանակ նոր շունչ հաղորդելով հայոց ազգային արժեքներին։

Հատուկ շնորհակալություն եմ ուզում հայտնել Հոգեշնորհ Տեր Ավետիսին՝ նրա հյուրընկալության և մեզ աջակցելու համար։ Ինձ համար առանձնահատուկ պատիվ էր նաև մասնակցել սրբալույս մյուռոնի օծման արարողությանը»,- նշել է բանաստեղծուհին:

Մարիաննա Շահպարոնյանը կշարունակի արտերկրում ներկայացնել «Դեպի Հայաստան» գիրքը, որի առաքելությունն է միավորել աշխարհասփյուռ հայերին ազգային արժեքների շուրջ, խրախուսել հայրենասիրությունն ու հայրենադարձությունը։ 

Առաջիկայում գիրքը կներկայացվի Արգենտինայի մայրաքաղաք Բուենոս Այրեսում։