4 րոպեի ընթերցում
ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ։ «Air Fest» փառատոնը ներկայանում է նոր ծրագրով ու թռիչքային ավելի մեծ հնարավորություններով։ Սեպտեմբերի 28-ին արդեն 5-րդ անգամ անցկացվելու է «Air Fest» փառատոնը։ Սկզբում այն անցկացվել է Ստեփանակերտում, նախորդ տարի՝ Ստեփանավանում, այս տարի օդային շոուների համար ընտրվել է Եղվարդը։ «Արմենպրես»-ի մամուլի սրահում հրավիրված ասուլիսում «Հայաստանի ընդհանուր ավիացիայի հիմնադրամ»-ի տնօրեն, «Air Fest» փառատոնի կազմակերպիչ, օդաչու Արմեն Սարգսյանը նշեց, որ փառատոնն արդեն բավական սիրված ու սպասված իրադարձություն է դարձել։
«Երբ նոր էինք սկսում անցկացնել, 2 ինքնաթիռ էր մասնակցում, այսօր մոտ 20 ինքնաթիռ ունենք։ Իրենց ինքնաթիռներով հյուրեր են գալու Վրաստանից, Գերմանիայից, Ֆրանսիայից, Ռուսաստանից։ Բավական հետաքրքիր օդային շոու է կազմակերպվելու։ Երկնքում կհայտնվեն ինքնաթիռներ, պարապլաններ, ուղղաթիռներ, օդապարիկներ և դրոններ»,-ասաց Արմեն Սարգսյանն՝ ընդգծելով, որ ակնկալվում է 4 հազարից ավելի այցելություն։
Փառատոնն ուղեկցվելու է նաև համերգային ծրագրով։ «Air Fest» փառատոնի համակարգող Ելենա Նալբանդյանը նշեց, որ ավիացիայով, ինքնաթիռներով, ընդհանրապես թռիչքներով բոլոր հետաքրքվածները կարող են գալ, ականատես լինել օդային գեղեցիկ շոուին, որը հետաքրքիր է լինելու նաև երեխաների համար։
«Միջոցառումը կմեկնարկի ժամը 12։00-ին է, մուտքն ազատ է, ունենք նաև անվճար տեղափոխության հնարավորություն՝ դեպի միջոցառման անցկացման վայր։ Մանրամասների համար պետք է այցելել Ինստագրամում մեր էջ ու նախապես գրանցվել։ Ունենալու ենք թռիչքների հնարավորություն պարապլաններով, ուղղաթիռներով, օդապարիկներով, որի տոմսերը պետք է նախապես ձեռք բերել»,-ասաց Ելենա Նալբանդյանը։
Պատասխանատուները նշում են, որ փառատոնը միայն հետաքրքիր ժամանցի մասին չէ, վերջինիս հիմնական նպատակը Հայաստանում փոքր ավիացիայի զարգացումն է։ «Air Fest»-ը հյուրընկալելու է ոլորտի առաջատար մասնագետներին, ովքեր կկիսվեն իրենց փորձով՝ անդրադառնալով ավիացիայի միտումներին։ Պրոֆեսիոնալ օդաչուները հանդես կգան նաև դասախոսություններով։
Փառատոնի անցկացմանն աջակցում է ՀՀ էկոնոմիկայի նախարարության զբոսաշրջության կոմիտեն։ Կոմիտեի մամուլի խոսնակ Անահիտ Բաղդասարյանը նշեց, որ փառատոնային տուրիզմը նկատելի զարգացում է ապրում Հայաստանում։ Տարվա ընթացքում կոմիտեն իր աջակցությունն է ցուցաբերում 10-ից ավելի փառատոնի։
«Արկածային տուրիզմը զբոսաշրջության ոլորտի առաջնահերթ ուղղություններից մեկն է։ Մենք ունենք առանձնացված ուղղություններ՝ մշակույթ, գաստրո, բնություն և արկածային։ Այս բոլոր ուղղություններով զբոսաշրջային հնարավորությունները զարգացնելու առումով հետևողական աշխատանք է տարվում։ Միջազգային խոշոր ցուցահանդեսներին առանձին շեշտադրմամբ ներկայացնում ենք փառատոնին տուրիզմի հնարավորությունները։ Ասեմ, որ արկածային տուրիզմը ևս զարգանում է, նախորդ տարիների համեմատ հիմա ավելի շատ պրոդուկտներով ենք հանդես գալիս»,-ասաց Անահիտ Բաղդասարյանը։
Առաջիկայում սպասվում են Արենի գինու, ինչպես նաև «Բացահայտիր Հայաստանը երկնքից» օդապարիկների փառատոնները։
Ելենա Նալբանդյան, Արմեն Սարգսյան, Անահիտ Բաղդասարյան
Արմեն Սարգսյան
Ելենա Նալբանդյան, Արմեն Սարգսյան, Անահիտ Բաղդասարյան
Անահիտ Բաղդասարյան
Ելենա Նալբանդյան