2 րոպեի ընթերցում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ։ Ուկրաինան կպատրաստի պատերազմի ավարտի մանրամասն պլան խաղաղության երկրորդ գագաթնաժողովի համար, որին անպայման պետք է մասնակցեն նաև Ռուսաստանի ներկայացուցիչները։ «Արմենպրես»-ի փոխանցմամբ՝ այս մասին Ուկրաինայի նախագահ Վլադիմիր Զելենսկին հայտարարել է NBC News-ին տված հարցազրույցում։
Ուկրաինայի նախագահի խոսքով՝ պատերազմի ավարտի ծրագիրը կնախապատրաստվի այն գործընկերների հետ, որոնք աջակցել են առաջին գագաթնաժողովի կոմյունիկեն։
«Մենք աշխատելու ենք (ՌԴ նախագահ) Պուտինի առաջացրած ճգնաժամերի յուրաքանչյուր կետի վրա։ Մենք կմշակենք պատերազմի ավարտի մեր տարբերակը», - ասել է Զելենսկին։
Նա նշել է, որ Ուկրաինան հասկանում է, որ առանց Ռուսաստանի պատերազմը դիվանագիտական ճանապարհով ավարտելը «շատ դժվար է», ուստի երկրորդ գագաթնաժողովին պետք է ներկա լինեն Ռուսաստանի Դաշնության ներկայացուցիչները։ Զելենսկիի խոսքով՝ դա խնդրել են նաև խաղաղության առաջին գագաթնաժողովի մասնակիցները։
«Բոլոր երկրները մեզ խնդրել են, որ երկրորդ գագաթնաժողովին ներկա լինեն Ռուսաստանի ներկայացուցիչները։ Մենք ասել ենք՝ մենք դեմ չենք, մենք ամեն ինչ հասկանում ենք, եկեք ծրագիր կազմենք և նրանց կանչենք», - ասել է Զելենսկին։
Ավելի վաղ Ուկրաինայի նախագահը հայտարարել էր, որ պետք է ամեն բան անել այն ուղղությամբ, որ խաղաղության երկրորդ համաշխարհային գագաթնաժողովը տեղի ունենա 2024 թվականին։