Telegram-ի հիմնադիր Պավել Դուրովը կարող է դատապարտվել մինչև 20 տարվա ազատազրկման

ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Telegram-ի հիմնադիր Պավել Դուրովին, ով օգոստոսի 24-ի երեկոյան ձերբակալվել է Ֆրանսիայում, կարող է սպառնալ մինչև 20 տարվա ազատազրկում:

«Արմենպրես»-ի հաղորդմամբ՝ այս մասին X-ի միկրոբլոգում գրել է  ֆրանսիացի լրագրող Կիրիլ Ամուրսկին՝ հավելելով, որ նա չի կարող ապաստան խնդրել Ֆրանսիայում, քանի որ հանդիսանում է այդ երկրի քաղաքացի:

Շաբաթ երեկոյան ֆրանսիական լրատվամիջոցները հայտնել են, որ Telegram-ի հիմնադիր Պավել Դուրովը ձերբակալվել է «Լե Բուրժե» օդանավակայանում։ Նա մասնավոր ինքնաթիռով, ըստ աղբյուրների,  ժամանել էր Ադրբեջանից։ 

Ֆրանսիական մամուլի տեղեկություններով՝ Դուրովը, ով Ֆրանսիայի քաղաքացիություն ունի, երկրի հետախուզման մեջ գտնվող անձանց ցուցակում էր գտնվում։

Ըստ ԶԼՄ-ների՝ ֆրանսիական արդարադատությունը Դուրովին համարում է հանցագործությունների մեջ ներգրավված մի շարք պատճառներով, այդ թվում՝ երկրի իշխանությունների հետ համագործակցությունից հրաժարվելու պատճառով: 

Non, #Durov ne peut pas faire de demande d’asile en France puisqu’il est français.

Il risque jusqu’à 20 ans de prison et sera face au tribunal demain soir.

Seule la France avait émis un avis de recherche à son encontre. pic.twitter.com/Z7GSeCywGQ

— Cyrille Amoursky (@AmourskyCyrille) August 24, 2024