2 րոպեի ընթերցում
ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: ՀՀ Արմավիրի մարզկենտրոնում հուլիսի 27-ին հանդիսավոր միջոցառմամբ տեղի է ունեցել քաղաքի գլխավոր շատրվանների բացումը:
«Արմենպրես»-ի հաղորդմամբ՝ այս մասին «Ֆեյսբուք»-ի իր էջում հայտնել է Արմավիրի մարզպետ Դավիթ Խուդաթյանը՝ հավելելով, որ միջոցառմանը ներկա են եղել ՀՀ տարածքային կառավարման և ենթակառուցվածքների նախարար Գնել Սանոսյանը, ԱԺ պատգամավորներ Արփի Դավոյանը, Արմեն Խաչատրյանը, մարզի համայնքների ղեկավարները, արմավիրցիներ, զորամասերի զինծառայողներ, քաղաքի հազարավոր հյուրեր:
Նրա տեղեկացմամբ՝ լուսաձայնային, լազերային գերժամանակակից շատրվանը կառուցվել է պետական համաֆինանսավորման ծրագրով` համայնքի և ՀՀ կառավարության համատեղ ֆինանսավորմամբ: Շինարարական աշխատանքների արժեքը 180 միլիոն դրամ է:
«Միջոցառման մեկնարկին Արմավիր համայնքի ղեկավար Վարշամ Սարգսյանի հետ շնորհավորեցինք արմավիրցիներին` տոնական օրվա առիթով, վստահեցրի, որ Արմավիրում և մարզի բոլոր համայնքներում տոնական այսպիսի օրեր ավելի հաճախ ենք ունենալու:
Մարզկենտրոն Արմավիրն այսուհետ ավելի շքեղ տեսքով կներկայանա արմավիրցիներին և քաղաքի հյուրերին, իսկ ամռան շոգ երեկոները հաճելի կզարդարվեն շատրվանների լուսաձայնային ներկայացումներով»,- նշել է մարզպետը: