1 րոպեի ընթերցում
ԵՐԵՎԱՆ, 15 ՄԱՅԻՍԻ, ԱՐՄԵՆՊՐԵՍ: Հայաստանի Հանրապետության պաշտպանության նախարարությունում ՀՀ նախագահի հրամանագրերով տեղի են ունեցել կադրային վերանշանակումներ, որոնք պայմանավորված են զինված ուժերի բարեփոխումների շրջանակում 2023 թվականի հոկտեմբեր ամսին ՀՀ կառավարության համապատասխան որոշումներով՝ ՀՀ ՊՆ և ԶՈՒ ԳՇ նոր կանոնադրությունների և կառուցվածքի հաստատման հանգամանքով:
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ ՊՆ մամուլի քարտուղար Արամ Թորոսյանը:
Նախագահի հրամանագրերով՝ Սամվել Մինասյանը նշանակվել է Տարածքային պաշտպանության զորքերի հրամանատար, Վահրամ Գրիգորյանը՝ ԶՈՒ ԳՇ ինժեներական զորքերի պետ-վարչության պետ, Սմբատ Գրիգորյանը՝ Զինված ուժերի գլխավոր շտաբի կազմակերպչական զորահավաքային գլխավոր վարչության պետ:
Պաշտպանության նախարարության ռազմաբժշկական ապահովման վարչության պետ է նշանակվել Գեղամ Փաշիկյանը, Թիկունքային ապահովման վարչության պետ՝ Արամ Պողոսյանը:
Նախագահի հրամանագրով՝ Մհեր Շիրինյանին վստահվել է ՊՆ սպառազինության և տեխնիկական ապահովման վարչության պետի պաշտոնը, Հրաչ Ստեփանյանին՝ Կադրային քաղաքականության գլխավոր վարչության պետի: