Հակոբ Արշակյանն օտարերկրյա գործարարների հետ քննարկել է Հայաստանում նոր հյուրանոցային համալիրների, բնակելի թաղամասերի կառուցման հնարավորությունները
1 րոպեի ընթերցում
ԵՐԵՎԱՆ, 16 ՀՈՒՆԻՍԻ, ԱՐՄԵՆՊՐԵՍ։ Հայաստանի Ազգային ժողովի փոխնախագահ Հակոբ Արշակյանն ընդունել է հյուրանոցային և ավիացիայի ոլորտների օտարերկրյա խոշոր գործարարների՝ Sunrise Resorts and Cruises, SkyMax Holidays-ի հիմնադիր և նախագահ Հոսամ Էլ Շաերին, Skymax Holidays-ի գլխավոր տնօրեն Ամր Ազաբին եւ ISR Air ավիաընկերության տնօրեն Յոսի Յոսեֆին։
«Արմենպրես»-ի փոխանցմամբ՝ այս մասին հայտնել է Հակոբ Արշակյանը։
Հանդիպման ժամանակ քննարկվել է Հայաստանում նոր հյուրանոցային համալիրների, բնակելի թաղամասերի եւ դրանց կից ենթակառուցվածքների կառուցման հնարավորությունները։ Այս համատեքստում հաշվի է առնվել Հայաստան այցելող զբոսաշրջիկների ու Հայաստան տեղափոխվող օտարերկրացիների ավելացող հոսքը։
Հյուրերը նշել են, որ Հայաստանում ներդրումներ կատարելու հարցում մեծ է Հայաստանի տնտեսական գրավչությունը։
Հանդիպմանը ներկա են եղել ԱԺ տնտեսական հարցերի մշտական հանձնաժողովի անդամ Ծովինար Վարդանյանը եւ Էկոնոմիկայի նախարար Վահան Քերոբյանը։