Չարլզ III-ը հետաձգել է այցը Ֆրանսիա՝ կենսաթոշակային բարեփոխումների դեմ ցույցերի պատճառով
1 րոպեի ընթերցում
![Չարլզ III-ը հետաձգել է այցը Ֆրանսիա՝ կենսաթոշակային բարեփոխումների դեմ ցույցերի պատճառով](http://armenpress.am/resized/480/static/news/b/2023/03/1107130.jpg)
ԵՐԵՎԱՆ, 24 ՄԱՐՏԻ, ԱՐՄԵՆՊՐԵՍ: Մեծ Բրիտանիայի թագավոր Չարլզ III-ի պետական այցը Ֆրանսիա հետաձգվել է՝ հաշվի առնելով հաջորդ շաբաթ Ֆրանսիայում նախատեսված ցույցերը կենսաթոշակային բարեփոխումների դեմ: Այս մասին հաղորդում է «Արմենպրես»-ը՝ վկայակոչելով GBnews պարբերականին:
Նշվում է, որ Ֆրանսիայի և Միացյալ Թագավորության կառավարությունները նման որոշում են ընդունել Ֆրանսիայի նախագահ Էմանուել Մակրոնի և Մեծ Բրիտանիայի թագավոր Չարլզ III-ի միջև կայացած հեռախոսազրույցից հետո:
Այցի հետագա ժամկետի մասին դեռ ոչինչ հայտնի չէ:
Ավելի վաղ Ֆրանսիայի ներքին գործերի նախարար Ժերալդ Դարմանինը հայտարարել էր, որ Ֆրանսիան պատրաստ է Մեծ Բրիտանիայի թագավոր Չարլզ III-ի այցին։
Ինչպես հայտնել էր «Արմենպրես»-ը, երեկ Ֆրանսիայում կենսաթոշակային բարեփոխումների դեմ հերթական ցույցերն ուղեկցվել էին անկարգություններով: Վիրավորվել էր 149 ոստիկան և ժանդարմ, ինչպես նաև տասնյակ ցուցարարներ: 172 մարդ ձերբակալվել էր: