«Դիմադրության» շարժումը հերթական հանրահավաքից հետո երթ անցկացրեց Երևանի կենտրոնում

ԵՐԵՎԱՆ, 17 ՄԱՅԻՍԻ, ԱՐՄԵՆՊՐԵՍ: Ընդդիմադիր ուժերը շարունակում են անհնազանդության ակցիաները՝ հայտարարելով, որ իրենց պայքարը տանելու են մինչև վերջ: Ինչպես հաղորդում է «Արմենպրես»-ի թղթակիցը՝ մայիսի 17-ի երեկոյան տեղի ունեցավ «Դիմադրության» շարժման հերթական հանրահավաքը, որի ընթացքում խոսվեց օրվա ընթացքում իրականացված գործողությունների մասին:

ՀՅԴ Հայաստանի գերագույն մարմնի ներկայացուցիչ Իշխան Սաղաթելյանը Ֆրանսիայի հրապարակում հավաքված քաղաքացիներին հաղորդեց, որ առավոտյան ժամը 8-ից մինչև 11:30-ը շուրջ 60 խումբ ցույցեր ու երթեր է արել Երևանում: Դաշնակցականը այդ համատեքստում քննադատեց ՀՀ ոստիկանության գործողությունները՝ ասելով, որ երեքուկես ժամվա ընթացքում պաշտոնական տվյալներով 414 քաղաքացի բերման ենթարկելն աննախադեպ է իր կարծիքով:

Հանրահավաքի ընթացքում ելույթ ունեցան նաև տնտեսագետ Հրանտ Բագրատյանը, պատգամավոր Աննա Գրիգորյանը, 2020 թ. 44-օրյա պատերազմում զոհվածների ծնողներ ու հարազատներ, Արցախյան պատերազմների վետերան Գեորգի Արիստակեսյանը, որը նախորդ օրը բերման էր ենթարկվել ոստիկանների կողմից և ավելի ուշ ազատ էր արձակվել՝ համացանցում տարածված տեսանյութերից հայտնի դառնալով որպես «Ժորա պապ»:

Իր ելույթի վերջում Իշխան Սաղաթելյանը առաջարկեց ցուցարարներին երթ անել Բաղրամյան-Պռոշյան փողոցներով, վերադառնալ ու նորից շարունակել հանրահավաքը:

414 քաղաքացիների բերման ենթարկելու լուրն ավելի վաղ «Արմենպրես»-ին հայտնել էին նաև ՀՀ ոստիկանության հասարակայնության հետ կապի և լրատվության վարչությունից։