2 րոպեի ընթերցում
ԳԱՎԱՌ, 22 ՓԵՏՐՎԱՐԻ, ԱՐՄԵՆՊՐԵՍ ։ Այս տարվա հունվարի 23-ից մինչեւ փետրվարի 13-ը Գեղարքունիքի մարզում անցկացվել է դպրոցականների առարկայական օլիմպիադայի մարզային փուլը, որի արդյունքների ամփոփումից հետո հաղթող ճանաչված 72 աշակերտներ երաշխավորվել են մասնակցելու օլիմպիադայի հանրապետական փուլին:
Ինչպես «Արմենպրես»-ին տեղեկացրին Գեղարքունիքի մարզպետարանի ԿՄՍ վարչությունից՝ առարկայական օլիմպիադայի մարզային փուլին մասնակցել են տարածքային փուլում հաղթող ճանաչված 478 աշակերտներ: Մարզային փուլում հաղթող ճանաչված 72 աշակերտներից 54-ը առցանց տարբերակով հաջողություն են գրանցել հումանիտար, իսկ 18-ը՝ բնագիտական առարկաներից: «Պատմություն, «Հայոց լեզու», «Հայ գրականություն», «Ռուսաց լեզու», «Հայ եկեղեցու պատմություն» առարկաներից հաղթող են ճանաչվել 8-ական տարբեր տարիքի դպրոցականներ։ 10 աշակերտ հաղթող են ճանաչվել «Աշխարհագրություն», 7 աշակերտ՝ նախնական զինվորական պատրաստություն, 4 աշակերտ՝ «Գերմաներեն», 3 աշակերտ՝ «Անգլերեն», 3 աշակերտ՝ «Մաթեմատիկա», 5 աշակերտ՝ «Կենսաբանություն» առարկաներից։ «Ֆրանսերեն», «Ֆիզիկա», «Աստղագիտություն», «Ինֆորմատիկա», «Քիմիա» առարկաների օլիմպիադաների մասնակիցները ցածր միավորներ հավաքելու պատճառռով չեն երաշխավորվել հանրապետական փուլի մասնակցությանը:
2021 թվականի դպրոցականների առարկայական օլիմպիադայի հանրապետական փուլը կընթանա փետրվարի 19-ից մայիսի 17-ն ընկած ժամանակահատվածում։
Խոսրով Խլղաթյան