Երևանի Էրեբունի վարչական շրջանի սննդի շղթայի տնտեսավարողների մոտ ՍԱՏՄ-ն խախտումներ չի հայտնաբերել
2 րոպեի ընթերցում
ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ: ՀՀ սննդամթերքի անվտանգության տեսչական մարմնի տեսուչները Երևանի Էրեբունի վարչական շրջանում իրականացվող մշտադիտարկման ու կրկնայցերի ընթացքում որևէ խանութում կամ հանրային սննդի օբյեկտում խախտումներ չեն արձանագրել: Այս մասին «Արմենպրես»-ին տեղեկացրին ՀՀ կառավարությունից։
«Տնտեսավարողների այսօրինակ գործելաոճը ոչ միայն ողջունելի է, այլև գնահատելի ու օրինակելի այլ կազմակերպությունների համար: Սա նշանակում է, որ սննդի ոլորտում զբաղված բիզնեսն ականջալուր է ՍԱՏՄ հորդորներին, խորհուրդներին ու ցուցումներին:
ՍԱՏՄ կողմից իրականացվող կասեցումների դինամիկան ևս ցույց է տալիս, որ տնտեսավարողներն առավել պատասխանատվությամբ են սկսել վերաբերվել կորոնավարակով (Covid 19) պայմանավորված սանիտարահիգիենիկ նորմերի պահպանմանը. այսօր տեսչական մարմնի մասնագետները կասեցրել են սննդի շղթայի միայն երկու տասնյակից մի փոքր ավելի կազմակերպությունների գործունեությունը: Պատճառը տարածված թերացումներն են՝ ջերմաչափման և ախտահանման վերաբերյալ գրանցամատյանների թերի վարելը, սեղանների և անձանց միջև սահմանված հեռավորությունը չապահովելը:
ՀՀ սննդամթերքի անվտանգության տեսչական մարմինը շարունակելու է վերահսկողությունը պարետի որոշումների կատարման նկատմամբ մանրածախ ու մեծածախ իրացման ցանցերում, արտադրություններում ու հանրային սննդի օբյեկտներում»,- նշված է հաղորդագրության մեջ: