2 წუთი კითხვის
ჩინეთის აღმოსავლეთში ასობით ათასი ადამიანი ევაკუირებულია ტაიფუნ „დელფინის“ შედეგად გამოწვეული კოკისპირული წვიმებისა და წყალდიდობების გამო. ხელისუფლებამ გააფრთხილა, რომ საფრთხე ჯერ კიდევ ნარჩუნდება, მიუხედავად იმისა, რომ ხმელეთზე მიღწევის შემდეგ ქარიშხალი შედარებით შესუსტდა. „არმენპრესის“ ცნობით, ამის შესახებ ჩინური საინფორმაციო სააგენტო Xinhua წერს.
10 აგვისტოს 07:00 საათის მონაცემებით, ფუძიანის პროვინციაში ხმელეთსა და ზღვაში არსებული სახიფათო ზონებიდან 167 900-მდე ადამიანი იქნა ევაკუირებული. ხოლო 9 აგვისტოს საღამოს შანჰაიში რისკის შემცველი ტერიტორიებიდან 215 600-მდე ადამიანი იქნა ევაკუირებული.
უხვი ნალექი უახლოეს პერიოდში გაგრძელდება.
ქარიშხალმა სერიოზული შეფერხებები გამოიწვია ტრანსპორტისა და ტურიზმის სფეროებში. ფუძიანში ხელისუფლებამ შეაჩერა 686 ავტობუსის მარშრუტისა და 658 მატარებლის მოძრაობა. ასევე დაიხურა 234 მსხვილი ტურისტული ობიექტი, გაუქმდა ათობით კულტურული და ტურისტული ღონისძიება.
BBC იუწყება, რომ მხოლოდ შანჰაიში 1000-მდე ფრენა გაუქმდა.
ადგილობრივმა ხელისუფლებამ მოსახლეობას მოუწოდა, მოერიდონ ღია ცის ქვეშ ღონისძიებებს; მთელი რიგი ცნობილი ტურისტული ობიექტები კვლავ დახურული რჩება, მათ შორის „დისნეილენდისა“ და „ლეგოლენდის“ გარკვეული ნაწილები.
ჩინეთის ხელისუფლებამ უფრო ადრე ტაიფუნ „დელფინის“ გამო საფრთხის უმაღლესი - წითელი დონის გაფრთხილება გამოაცხადა. ეს არის ყველაზე ძლიერი ქარიშხალი, რომელიც წელს ჩინეთს დაატყდა თავს.