სომხეთისა და ჩინეთის თავდაცვის მინისტრებმა თანამშრომლობის საკითხები განიხილეს

სომხეთის თავდაცვის მინისტრი სურენ პაპიკიანი 15 სექტემბერს პეკინში ჩინეთის თავდაცვის მინისტრს, ადმირალ დუნ ჯუნს შეხვდა.

„არმენპრესის“ ცნობით, სომხეთის თავდაცვის სამინისტროდან იუწყებიან, რომ შეხვედრისას განიხილეს თავდაცვის სფეროში სომხეთ-ჩინეთის თანამშრომლობისა და მისი განვითარების პერსპექტივებთან დაკავშირებული საკითხები.

მხარეებმა მაღალი შეფასება მისცეს თავდაცვის სფეროში ორმხრივი თანამშრომლობის დონეს და ხაზი გაუსვეს ურთიერთქმედების ახალი მიმართულებების განვითარებისა და გრძელვადიანი დაგეგმვის მნიშვნელობას.

შეხვედრაში ასევე მონაწილეობდა ჩინეთის სახალხო რესპუბლიკაში სომხეთის რესპუბლიკის საგანგებო და უფლებამოსილი ელჩი ვაჰე გევორგიანი.

შეგახსენებთ, რომ სომხეთის რესპუბლიკის თავდაცვის მინისტრ სურენ პაპიკიანის ხელმძღვანელობით დელეგაცია სამუშაო ვიზიტით ჩინეთის სახალხო რესპუბლიკაში გაემგზავრა.