ევროკავშირმა დაამტკიცა რუსეთის წინააღმდეგ სანქციების მე-17 პაკეტი: კალასი

ევროკავშირმა დაამტკიცა რუსეთის წინააღმდეგ სანქციების მე-17 პაკეტი, რომელიც მიზნად ისახავს „ჩრდილოვანი ფლოტის“ დაახლოებით 200 გემს. როგორც „არმენპრესი“ იტყობინება, ამის შესახებ სოციალურ ქსელ X-ში განცხადება გააკეთა ევროკავშირის საგარეო საქმეთა და უსაფრთხოების პოლიტიკის საკითხებში უმაღლესმა წარმომადგენელმა კაია კალასმა.

მისი თქმით, სანქციები ასევე ეხება ჰიბრიდულ საფრთხეებსა და ადამიანის უფლებების საკითხებს. გარდა ამისა, კალასის განმარტებით, ევროკავშირი ამზადებს რუსეთის წინააღმდეგ ახალი სანქციების მიღებასაც.

„რაც უფრო დიდხანს გააგრძელებს რუსეთი ომს, მით უფრო მკაცრი იქნება ჩვენი პასუხი“, – დაწერა კალასმა.

მოსალოდნელია, რომ სანქციების მე-17 პაკეტი გამოქვეყნდება ევროკავშირის ოფიციალურ ჟურნალში 20 მაისის გვიან საღამოს.