სომხეთის გენერალურმა პროკურატურამ და ევროპის პროკურატურამ თანამშრომლობის შესახებ შეთანხმებას მოაწერეს ხელი

ლუქსემბურგში სომხეთის რესპუბლიკის გენერალურმა პროკურორმა ანა ვარდაპეტიანმა და ევროპის გენერალურმა პროკურორმა ლაურა კოდრუცა კოვეშიმ ხელი მოაწერეს სამუშაო შეთანხმებას სომხეთის რესპუბლიკის გენერალურ პროკურატურასა და ევროპის პროკურატურას შორის თანამშრომლობის შესახებ.

„არმენპრესის“ ცნობით, სომხეთის პროკურატურიდან იუწყებიან, რომ დოკუმენტის მიზანია სომხეთის რესპუბლიკის გენერალურ პროკურატურასა და ევროპის პროკურატურას შორის თანამშრომლობის განმტკიცება მათ კომპეტენციებში შემავალი გამოძიებებისა და სისხლისსამართლებრივი დევნის სფეროში.

სამუშაო შეთანხმებით განსაკუთრებული ყურადღება ეთმობა ფინანსურ დანაშაულებთან ბრძოლას, სომხეთის რესპუბლიკისა და ევროკავშირის ფინანსური ინტერესების ეფექტიანი დაცვის საჭიროების გათვალისწინებით.

სამუშაო შეთანხმების თანახმად, მხარეები ერთმანეთს გაუწევენ მაქსიმალურ მხარდაჭერას კონკრეტული საქმის ფარგლებში ინფორმაციისა და მტკიცებულებების მოპოვებაში, მოქმედი ეროვნული კანონმდებლობისა და შესაბამისი საერთაშორისო-სამართლებრივი დოკუმენტების ფარგლებში.

თანამშრომლობის მნიშვნელოვან მიმართულებებს ასევე წარმოადგენს დანაშაულებრივი გზით მოპოვებული აქტივების გაყინვა, ამოღება და კონფისკაცია. მხარეებს, თავიანთი კომპეტენციის ფარგლებში და მოქმედი სამართლებრივი რეგულაციების შესაბამისად, ასევე შეუძლიათ ითანამშრომლონ ერთობლივი საგამოძიებო ჯგუფების ფორმატში.

სამუშაო შეთანხმება ასევე ითვალისწინებს ერთობლივი გადამზადებების ჩატარებას, სემინარების, სამუშაო შეხვედრებისა და კონფერენციების ორგანიზების ფარგლებში თანამშრომლობას, აგრეთვე ორმხრივ ტექნიკურ და სხვა სახის მხარდაჭერას.

სომხეთის გენერალურმა პროკურორმა ანა ვარდაპეტიანმა, ხაზი გაუსვა რა ევროპის პროკურატურასთან თანამშრომლობის თვისობრივად ახალ ეტაპზე გადამყვანი დოკუმენტის ხელმოწერის მნიშვნელობას, აღნიშნა: „ფინანსური დანაშაულები თავისი ბუნებით ხშირად სცილდება ერთი სახელმწიფოს საზღვრებს, ხოლო უკანონო გზით მოპოვებული სახსრების მოძრაობამ შესაძლოა მრავალი იურისდიქცია გაიაროს. შესაბამისად, მათი ეფექტიანი გამოვლენა და დანაშაულებრივი გზით მოპოვებული აქტივების აღდგენა სამართალდამცავ ორგანოებს შორის სწრაფ, კოორდინირებულ და სანდო თანამშრომლობას მოითხოვს. სომხეთის რესპუბლიკის გენერალური პროკურატურა დიდ მნიშვნელობას ანიჭებს ევროპის პროკურატურასთან თანამშრომლობის ამ ახალი დონის ჩამოყალიბებას. დარწმუნებული ვარ, რომ სამუშაო შეთანხმებას პრაქტიკული მნიშვნელობა ექნება როგორც ევროკავშირის ფინანსური ინტერესების დაცვის, ისე სომხეთის რესპუბლიკისა და ევროკავშირისთვის ინტერესის შემცველი ფინანსური დანაშაულების წინააღმდეგ ბრძოლის ეფექტიანობის ამაღლების თვალსაზრისით. ჩვენი მიზანია უზრუნველვყოთ, რომ დანაშაულებრივი საქმიანობა და უკანონოდ მოპოვებული აქტივების სხვა ქვეყნებში გატანა უსჯელობის გარანტიად არ იქცეს“.

ევროპის გენერალურმა პროკურორმა ლაურა კოდრუცა კოვეშიმ, შეთანხმების მიღწევაზე საუბრისას, აღნიშნა: „დღეს სომხეთის რესპუბლიკის გენერალურ პროკურორთან ერთად შევთანხმდით იმაზე, თუ როგორ ვითანამშრომლებთ იმ დანაშაულებებთან ბრძოლაში, რომლებმაც თაღლითობის გზით ევროკავშირის ბიუჯეტს ზიანი მიაყენეს. დამნაშავეები საზღვრებთან არ ჩერდებიან და არც ჩვენ გავჩერდებით. ჩვენ მივყვებით მათ მიერ თაღლითურად მითვისებულ თანხებს, მიუხედავად იმისა, თუ სად მალავენ მათ, და დავაბრუნებთ ამ სახსრებს“.

სამუშაო შეთანხმება ძალაში შედის დღეიდან - 2026 წლის 11 სექტემბრიდან.