ანტიკორუფციული კომიტეტი რობერტ ქოჩარიანისა და მისი ოჯახის წევრების კუთვნილ მისამართებზე ჩხრეკას ატარებს

სომხეთის ანტიკორუფციული კომიტეტი კორუფციული ხასიათის დანაშაულების საქმეზე მიმდინარე სისხლისსამართლებრივი წარმოების ფარგლებში ჩხრეკასა და სხვა საპროცესო მოქმედებებს ატარებს სომხეთის რესპუბლიკის მეორე პრეზიდენტის, რობერტ ქოჩარიანისა და მისი ოჯახის წევრების კუთვნილ რამდენიმე ათეულ მისამართზე.

„არმენპრესის“ ცნობით, ამის შესახებ იუწყება სომხეთის რესპუბლიკის ანტიკორუფციული კომიტეტი.

„პასუხად გაცნობებთ, რომ სომხეთის რესპუბლიკის ანტიკორუფციულ კომიტეტში კორუფციული ხასიათის დანაშაულების საქმეზე მიმდინარე სისხლისსამართლებრივი წარმოების ფარგლებში რამდენიმე ათეულ მისამართზე ტარდება ჩხრეკა და სხვა საპროცესო მოქმედებები. აუცილებლობის შემთხვევაში გავრცელდება დამატებითი ინფორმაცია“, - განაცხადეს ანტიკორუფციულ კომიტეტში.

უფრო ადრე, ეროვნული ასამბლეის ფრაქცია „სომხეთის“ დეპუტატმა მესროპ მანუკიანმა განაცხადა, რომ სამართალდამცველები შევიდნენ მეორე პრეზიდენტის შვილის, ეროვნული ასამბლეის ფრაქცია „სომხეთის“ დეპუტატ ლევონ ქოჩარიანის სახლში.

სომხეთის რესპუბლიკის მეორე პრეზიდენტის ოფისის ხელმძღვანელმა ბაგრატ მიქოიანმა კი განაცხადა, რომ 25 აგვისტოს დილას საგამოძიებო ორგანოებმა რობერტ ქოჩარიანი ანტიკორუფციულ კომიტეტში გადაიყვანეს.