398.64
ԱՄՆ-ում զարգացումները Թրամփի երդմնակալությունից հետո
Թարմացվել է՝
Թրամփը հրամանագիր է ստորագրել Կլիմայի փոփոխության շուրջ Փարիզի համաձայնագրից ԱՄՆ-ի դուրս գալու մասին
ԱՄՆ նախագահ Դոնալդ Թրամփը հունվարի 20-ին կատարողական հրամանագիր է ստորագրել Կլիմայի փոփոխության շուրջ Փարիզի համաձայնագրից ԱՄՆ-ի դուրս գալու մասին: «Արմենպրես»-ի փոխանցմամբ՝ հրամանագրի տեքստը հրապարակվել է Սպիտակ տան կայքում։
«Միավորված ազգերի կազմակերպությունում Ամերիկայի Միացյալ Նահանգների դեսպանն անհապաղ պաշտոնական գրավոր ծանուցում կներկայացնի Փարիզի համաձայնագրից Ամերիկայի Միացյալ Նահանգների դուրս գալու մասին՝ Կլիմայի փոփոխության վերաբերյալ Միավորված ազգերի կազմակերպության շրջանակային կոնվենցիային համապատասխան… Միացյալ Նահանգները կհամարի, որ համաձայնագրից և դրա հետ կապված ցանկացած պարտավորությունից իր դուրս գալն ուժի մեջ կմտնի սույն ծանուցումն ստանալուց անմիջապես հետո», - ասված է հրամանագրում։
Մուլինոն մերժել է Թրամփի խոսքերը Պանամայի ջրանցքը վերադարձնելու մասին
Պանամայի նախագահ Խոսե Ռաուլ Մուլինոն մերժել է ԱՄՆ նախագահ Դոնալդ Թրամփի՝ Պանամայի ջրանցքը «հետ վերցնելու» ծրագիրը՝ իր ամերիկացի պաշտոնակցին ասելով, որ առանցքային առևտրային ուղին «կա և կմնա» երկրի ձեռքում։ «Արմենպրես»-ի փոխանցմամբ՝ այս մասին հաղորդում է BBC-ն։
Դոնալդ Թրամփը հունվարի 20-ին իր երդմնակալության ելույթում հայտարարել է, որ Պանաման խախտել է չեզոք մնալու խոստումը՝ պնդելով, թե «Չինաստանը շահագործում է Պանամայի ջրանցքը»:
Թրամփը հայտարարել է, որ ՆԱՏՕ-ի երկրները պետք է ՀՆԱ-ի 5%-ը հատկացնեն պաշտպանական ծախսերին
ԱՄՆ նախագահ Դոնալդ Թրամփը կձգտի հասնել այն բանին, որ ՆԱՏՕ-ի անդամ պետությունները պաշտպանական ծախսերը հասցնեն իրենց ՀՆԱ-ի մինչև 5%-ի մակարդակին: «Արմենպրես»-ի փոխանցմամբ՝ այս մասին Թրամփը հայտարարել է հունվարի 20-ի երեկոյան Սպիտակ տան Օվալաձև աշխատասենյակում լրագրողների հետ կայացած զրույցի ժամանակ։
«ՆԱՏՕ-ն պետք է ավելի շատ գումար վճարի: ՆԱՏՕ-ն պետք է վճարի 5 տոկոս», - ընդգծել է Թրամփը։
Թրամփը սպառնացել է մաքսատուրքերով, եթե ԵՄ-ն ավելի շատ նավթ և գազ չգնի ԱՄՆ-ից
ԱՄՆ նախագահ Դոնալդ Թրամփը Եվրոպական միության երկրներին սպառնացել է առևտրային մաքսատուրքերով, եթե նրանք չսկսեն ավելի շատ ամերիկյան նավթ և գազ գնել։ «Արմենպրես»-ի փոխանցմամբ՝ այս մասին հաղորդում է Bloomberg-ը:
«Գիտեք, մենք Եվրոպական միության հետ շուրջ 300 միլիարդ դոլարի դեֆիցիտ ունենք: Եվ այդ պատճառով մենք դա կարգի կբերենք կա՛մ մաքսատուրքերով, կա՛մ էլ նրանք պետք է գնեն մեր նավթը: Միակ բանը, որ նրանք կարող են անել, արագ մեր նավթն ու գազը գնելն է», - ասել է Դոնալդ Թրամփը՝ հունվարի 20-ի երեկոյան Սպիտակ տանը մի քանի հրամանագրեր ստորագրելով:
Թրամփը կառավարությունում հիմնել է կառույց Մասկի գլխավորությամբ
ԱՄՆ նախագահ Դոնալդ Թրամփը հունվարի 20-ին Սպիտակ տանն ստորագրել է հրամանագիր կառավարության արդյունավետության բարձրացման նպատակով երկրում կառույց ստեղծելու մասին՝ իր կողմնակից միլիարդատեր Իլոն Մասկի գլխավորությամբ։ «Արմենպրես»-ի փոխանցմամբ՝ հրամանագրի տեքստը հրապարակել է Սպիտակ տունը։
«Սույն գործադիր հրամանագրով ստեղծվում է Կառավարության արդյունավետության վարչություն (DOGE)՝ իրականացնելու նախագահի DOGE օրակարգը՝ արդիականացնելով դաշնային տեխնոլոգիաները և ծրագրակազմը՝ առավելագույնի հասցնելու կառավարության արդյունավետությունն ու արտադրողականությունը», - նշված է փաստաթղթի տեքստում: