3 րոպեի ընթերցում
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Մոսկվայի կառավարությունը Երևանում ընթացող Տեղեկատվական տեխնոլոգիաների համաշխարհային համաժողովի (WCIT-2019) ընթացքում ներկայացրեց իր տաղավարն ու այն ծառայությունները, որոնք կարող է մատուցել համաժողովի մասնակիցներին ու հյուրերին:
«Արմենպրես»-ի փոխանցմամբ՝ Մոսկվայի ինովացիոնգործակալությանգլխավոր տնօրեն Ալեքսեյ Պարաբուչևը նշեց, որ տեղեկատվական տեխնոլոգիաների զարգացմանը զուգահեռ մեծանում է դրանցից օգտվողների քանակը:
«Մեր տաղավարը բաղկացած է մի քանի հիմնական ուղղություններից: Առաջինը բիզնեսի ուղղությունն է: Այստեղ ներկայացնում ենք, թե ինչ կազմակերպություններ են գործում Մոսկվայում և ինչ ծառայություններ կարող են մատուցել դրանք մարդկանց, որոնք գտնվում են այստեղ: Հաջորդ ուղղությունը մեծ ծրագրերինն է, որոնք իրականացնում է Մոսկվայի կառավարությունը, և որոնց մասնակցելու ենք հրավիրում բոլորին, ովքեր գտնվում են այստեղ»,- ասաց Պարաբուչևը:
Տաղավարում ներկայացվող հավելվածներից մեկի միջոցով յուրաքանչյուրը կարող է ստանալ իրեն հետաքրքրող սոցիալական, առողջապահական կամ ոլորտի ծրագրերի մասին տեղեկությունը հաշված րոպեների ընթացքում:
ՏՏ համաշխարհային համաժողովը հիմնադրել է Տեղեկատվական տեխնոլոգիաների և ծառայությունների համաշխարհային դաշինքը։Համաժողովը կազմակերպում է Առաջատար տեխնոլոգիաների ձեռնարկությունների միությունը։Այս տարի «WCIT» ՏՏ համաշխարհային համաժողովի թեման է՝ «Ապակենտրոնացման ուժը. ակնկալիք և վտանգ»։ Հոկտեմբերի 6-9-ն անցկացվելիք համաժողովի ընթացքում հանգամանորեն կքննարկվի, թե ինչպես են տեղեկատվական և հաղորդակցության տեխնոլոգիաները թե՛ դրական, թե՛ բացասական առումներով վերափոխում մեր կյանքը, ինչ ազդեցություն են ունենում շահույթի և բարեկեցության, ապահովության և անվտանգության, ժողովրդավարության և մարդասիրության վրա։ Երևանյան համաժողովին սպասվում է ավելի քան 2500 մասնակից՝ 70 երկրից։ Համաժողովը հյուրընկալվում է Հայաստանում՝ ՀՀ կառավարության բարձր հովանու ներքո և աջակցությամբ։
Տեղեկատվական տեխնոլոգիաների 23-րդ համաշխարհային համաժողովի՝ WCIT-2019-ի ժամանակ հատուկ զեկույցով հանդես գալու համար Հայաստան է ժամանել աշխարհահռչակ Քիմ Քարդաշյանը: «Գաղափարների շուկա» խորագրով քննարկմանը Քարդաշյանը, որպես սոցցանցերում ամենաշատ հետևորդներ ունեցող անձանցից մեկը, կկիսվի իր փորձով, կներկայացնի, թե ինչպես կարելի է այդ հարթակներն օգտագործել բիզնեսի զարգացման համար: