2 րոպեի ընթերցում
ԵՐԵՎԱՆ, 19 ԱՊՐԻԼԻ, ԱՐՄԵՆՊՐԵՍ: Ալ. Սպենդիարյանի անվան օպերայի և բալետի ազգային թատրոնում տրվեց E-CULT նոր աբոնեմենտային համակարգի մեկնարկը:
«Արմենպրես»-ի հաղորդմամբ՝ E-CULT դպրոցական աբոնեմենտային համակարգը ստեղծվել է ՀՀ կրթության և գիտության և Մշակույթի նախարարությունների համատեղ ջանքերով: Այն հասանելի է Dasaran կրթական հարթակում:
ՀՀ ԿԳ նախարար Արայիկ Հարությունյանը կարևորեց այս ձեռնարկը, որից հնարավորություն ունի օգտվել շուրջ 370 հազար աշակերտ:
«Մեկ տարվա ընթացքում, պետության հովանավորությամբ աշակերտները հնարավորություն ունեն այցելել Ազգային պատկերասրահ, թանգարաններ, թատրոն կամ համերգասրահ»,- նշեց նախարարը և հավելեց, որ այս նախագիծը կստեղծի նոր կրթական համակարգ ու նոր արժեք դպրոցում:
Նրա խոսքով՝ dasaran.am կայքի և E-CULT էջի միջոցով մեկնարկում ենք թատրոնների և համերգասրահների փուլը: Այսպիսով` աշակերտները հնարավորություն կունենան իրենց ծնողների միջոցով՝ ուսուցիչների հետ միասին, այցելել մշակութային հաստատություններ ու ներկա գտնվել իրենց համար ցանկալի միջոցառմանը:
Dasaran կրթական հարթակի հիմնադիր Սուրեն Ալոյանը ներկայացրեց համակարգը և նշեց, որ այն հնարավորություն կընձեռի Հայաստանում սովորող բոլոր աշակերտներին և ուսուցիչներին ստանալ մշակութային հաստատություններ այցելելու 3 անվճար տոմս յուրաքանչյուր ուսումնական տարվա համար:
Համակարգի միջոցով հնարավոր կլինի տեսնել մշակութային հաստատությունների մասին ամբողջական տեղեկություն, ինչպես նաև ընտրել ներկայացման կամ միջոցառման օրն ու դահլիճում առկա տեղերը: E-CULT-ի միջոցով հնարավոր է նաև հրավիրել ընկերների ու համատեղ այց կազմակերպել:
2018 թվականին ծրագրին մասնակցել է ավելի քան 60 հազար աշակերտ և այցելել թանգարաններ ու պատկերասրահ: