2 րոպեի ընթերցում
ԵՐԵՎԱՆ, 11 ԱՊՐԻԼԻ, ԱՐՄԵՆՊՐԵՍ: «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտը 2018 թվականին ունեցել է 113 հազար այցելու, իսկ Արցախի մասնաճյուղը՝ 16 հազար:
«Արմենպրես»-ի հաղորդմամբ՝ ամփոփելով 2018 թվականին իրականացրած աշխատանքները, այս մասին լրագրողների հետ զրույցում ասաց Մեսրոպ Մաշտոցի անվան «Մատենադարան» հին ձեռագրերի գիտահետազոտական ինստիտուտի տնօրեն Վահան Տեր-Ղևոնդյանը:
«Անցյալ տարվա համեմատ Երևանում մոտ 4000-ով ավել մարդ է այցելել Մատենադարան: Արցախի համար էլ այս թիվը բավականին մեծ ցուցանիշ է»,- նշեց Տեր-Ղևոնդյանը:
Անդրադառնալով Մատենադարանի իրականացրած հրատարակումների որակական և քանակական արդյունքներին՝ նա նկատեց, որ դրանք գոհացուցիչ են:
«Եթե նայում ենք գրքերի, մենագրությունների, հոդվածների, զեկուցումների, մատենաշարների, գիտական պարբերականի ընթացքը, ապա այս բոլոր արդյունքները գոհացուցիչ են: Հրատարակվել է «Մատենագիրք հայոց»–ը՝ նվիրված Ներսես Շնորհալու չափածո գործերին: Առաջիկայում լույս կտեսնի արձակ գործերին նվիրված մեկ հատոր: 30 տարի անց լույս է տեսել նաև «Հայերեն ձեռագրերի հիշատակարաններ» գիրքը»,- ասաց նա և հավելեց, որ Մատենադարանի ֆոնդը համալրվել է՝ նվիրաբերվել է 51 ձեռագիր, ինչպես նաև մեծ չափով արխիվներ: